नेपालमा विदेशी नागरिकहरूलाई शङ्कास्पद गतिविधिको आरोपमा पक्राउ

Prime TV News एक महिना अगाडि

काठमाडौ । नेपालमा अध्यागमन विभागले भिसा उद्देश्य विपरीत शङ्कास्पद गतिविधि गरेको आरोपमा एक जना चिनियाँ नागरिक र एक जना अमेरिकी नागरिकलाई नियन्त्रणमा लिएको छ।

अध्यागमन विभागका निर्देशक टीकाराम ढकालका अनुसार, चिनियाँ नागरिकलाई सोमबार चाबहिलबाट र अमेरिकी नागरिकलाई ठैवबाट पक्राउ गरिएको हो। प्रारम्भिक अनुसन्धानले दुबै विदेशीले आफ्नो भिसा प्रकार अनुसारको गतिविधि भन्दा फरक काममा संलग्न रहेको देखाएको छ।

पक्राउ परेका चिनियाँ नागरिक २०१२ मा पर्यटक भिसामा नेपाल प्रवेश गरेका थिए र त्यसपछि १३ पटक व्यावसायिक भिसा लिएका थिए। उनले ६ वटा कम्पनी स्थापना गरेका थिए भने विभिन्न विद्यालयमा अध्यापन पनि गर्दै आएका थिए। निर्देशक ढकालले भने, “पर्यटक र व्यावसायिक भिसामा नेपालमा बस्दा विदेशी नागरिकले काम गर्न नपाउने कानुनी व्यवस्था छ।”

अमेरिकी नागरिक पहिलो पटक २०१७ मा नेपाल आएका थिए र सन् २०२० मा पुनः प्रवेश गरेर सिन्धुपाल्चोकको साँगाचोकगढीमा “क्याल्भेरी सर्भिस सेन्टर प्रालि” नामक कम्पनी स्थापना गरेका थिए। प्रारम्भिक अनुसन्धान अनुसार उनले ललितपुरको गोदावरीमा बालगृह सञ्चालन गर्दै बालबालिकालाई क्रिस्चियन धर्म प्रचारमा लगाउने गरेको भेटिएको छ।

अध्यागमन विभागले दुबै विदेशीलाई नियन्त्रणमा राखेर अनुसन्धान जारी राखेको जनाएको छ। उनीहरूको नाम हाल सार्वजनिक गरिएको छैन।