चीनले म्यानमारमा ठगी सञ्चालन गरेको परिवारका ११ सदस्यलाई मृत्युदण्ड

Prime TV News एक महिना अगाडि

काठमाडौ । चीनले म्यानमारमा ठगी र अवैध गतिविधि सञ्चालन गरेको आरोपमा मिङ परिवारका ११ सदस्यलाई मृत्युदण्डको सजाय सुनाएको छ।

झेजियाङ प्रान्तको अदालतले मिङ परिवारलाई हत्या, अवैध थुना, ठगी र जुवाखाल सञ्चालन गरेको दोषी ठहर गर्दै यो कठोर निर्णय गरेको सरकारी सञ्चारमाध्यमले जनाएको छ। म्यानमारको सीमानजिक लाउकाइ सहरमा प्रभावशाली रहेको मिङ परिवारको शासनकालमा उक्त क्षेत्र क्यासिनो र रेडलाइटको चमकदार केन्द्रमा परिणत भएको थियो।

सन् २०२३ मा म्यानमारका अधिकारीहरूले परिवारलाई पक्राउ गरी चीनमा हस्तान्तरण गरेपछि ठगी साम्राज्य ध्वस्त भएको थियो। अदालतका अनुसार मिङ माफियाले सन् २०१५–२०२३ बीचमा १० अर्ब युआनभन्दा बढी अवैध आम्दानी गरेका थिए। उनीहरूको अपराधका कारण कम्तीमा १४ चिनियाँ नागरिकको ज्यान गएको थियो र कैयौँ घाइते भएका थिए।

विगत केही वर्षमा म्यानमारका यस्ता ठगी केन्द्रमा हजारौं चिनियाँ कामदार फस्दै आएका थिए। मानिस तस्करी र विदेशमा रहेका व्यक्तिहरूलाई ठग्न बाध्य पार्ने चलन पनि यसै क्रममा भएको थियो। गत वर्ष, थाइल्यान्डमा अभिनयका लागि गएका एक चिनियाँ कलाकारलाई म्यानमारको स्क्याम सेन्टरमा पुर्‍याइएको घटना सामाजिक सञ्जालमा भाइरल भएपछि बेइजिङमा व्यापक आक्रोश फैलिएको थियो।