चार वर्षदेखि चलिरहेको रुस युक्रेन युद्धमा रुसले हिउँद यामलाई रणनीतिक हतियारझैँ प्रयोग गर्दै आएको छ। हरेक जाडोमा युक्रेनको विद्युत्, ताप प्रणाली र आधारभूत पूर्वाधारमाथि आक्रमण गरिँदा सर्वसाधारण नागरिक चरम पीडामा पर्दै आएका छन्। यहि सन्दर्भमा ट्रम्पको दाबी सही भए, यो अस्थायी भए पनि मानवीय राहत हुनसक्छ।

रुसले अहिलेसम्म यस कथित सहमतिबारे कुनै आधिकारिक टिप्पणी गरेको छैन। न युद्धविरामको घोषणा भएको छ, न आक्रमण रोकिएको औपचारिक सूचना आएको छ। 

युक्रेनको मौसम विभागले किभमा तापक्रम तीव्र रूपमा घट्ने चेतावनी दिएको छ। शनिबारदेखि लगातार चार दिनसम्म रातिको तापक्रम –२० डिग्री सेल्सियसभन्दा तल झर्ने अनुमान छ। यस्तो कठोर जाडोमा ऊर्जा संरचनामाथि आक्रमण भए मानवीय संकट झनै भयावह हुने निश्चित छ।

युक्रेनी राष्ट्रपति भोलोदिमिर जेलेन्स्कीले भने ट्रम्पको घोषणाप्रति आशा व्यक्त गरेका छन्। सामाजिक सञ्जाल ‘एक्स’मार्फत उनले यो सहमति व्यवहारमा लागू होस् भन्ने कामना गर्दै कम्तीमा एक हप्ताका लागि नागरिक सुरक्षित रहने अपेक्षा व्यक्त गरेका छन्।