सरकारी प्रसारक पाकिस्तान टेलिभिजनका अनुसार क्वेटा, नुस्की, दलबन्दिन, पास्नी र ग्वादरसहित एक दर्जनभन्दा बढी स्थानमा एकैसाथ आक्रमण गरिएको थियो। प्रतिबन्धित पृथकतावादी समूह बलुचिस्तान लिबेरेसन आर्मी (बीएलए) ले ती आक्रमणहरूको जिम्मेवारी खुलेआम लिएको छ।

ग्वादरमा भएको आक्रमण अत्यन्तै अमानवीय देखिएको छ। निःशस्त्र मजदुरलाई लक्षित गरी गरिएको गोलीकाण्डमा ५ पुरुष, ३ महिला र ३ बालबालिकासहित ११ सर्वसाधारणको ज्यान गएको छ। यो हमला केवल आतंकवाद होइन, सीधा मानवतामाथिको आक्रमण भएको टिप्पणी गरिएको छ।

सुरक्षा बलसँगको भिडन्तमा १० जना प्रहरी र सुरक्षाकर्मीले पनि ज्यान गुमाएका छन् भने अन्य केही घाइते भएका छन्। क्वेटामा हिंसा शक्तिशाली विष्फोटबाट सुरु भई करिब दुई घण्टासम्म लगातार गोली हानाहान भएको थियो।

स्थिति नियन्त्रणमा लिन सुरक्षा बलले संवेदनशील क्षेत्रहरू पूर्ण रूपमा सिल गरेको छ। क्वेटा आउने–जाने सबै रेल सेवा निलम्बन गरिएको छ भने प्रभावित क्षेत्रमा इन्टरनेट सेवा समेत बन्द गरिएको छ। यसले अवस्था कति अस्थिर छ भन्ने झनै स्पष्ट बनाउँछ।

यसैबीच, मस्तुङ जेलमा भएको आक्रमणको मौका छोपी २७ कैदी फरार भएका छन्, जसले सुरक्षा संयन्त्रको कमजोरीलाई पनि उजागर गरेको छ।

संघीय आन्तरिक मामिलामन्त्री मोहसिन नक्वी क्वेटा पुगेर बलुचिस्तानका मुख्यमन्त्री सरफराज बुग्ती तथा वरिष्ठ सैन्य र नागरिक अधिकारीहरूसँग सुरक्षा अवस्थाबारे उच्चस्तरीय समीक्षा बैठक गरेका छन्।

पाकिस्तानी सेनाको सञ्चार शाखाका अनुसार हर्नई र पन्जगुर जिल्लामा गुप्तचर सूचनाका आधारमा गरिएको कारबाहीमा ठूलो मात्रामा हतियार र गोलाबारुद बरामद गरिएको छ। हर्नईमा ३० र पन्जगुरमा ११ बन्दुकधारी मारिएको सेनाले जनाएको छ।