युक्रेनको सबैभन्दा ठूलो निजी ऊर्जा कम्पनी डीटीईकेले आक्रमणमा परेको बस आफ्नै भएको जनाएको छ। कम्पनीका अनुसार उक्त बसले निप्रोपेत्रोभ्स्क क्षेत्रमा रहेको खानीबाट सिफ्ट सकेर मजदुरहरूलाई घर फर्काउँदै थियो।

डीटीईकेले रुसले आफ्ना खानी क्षेत्रहरूलाई लक्षित गर्दै ठूलो परिमाणको आतंकवादी हमला गरेको आरोप लगाएको छ। निप्रो निप्रोपेत्रोभ्स्क क्षेत्रको प्रशासनिक केन्द्र हो। पछिल्लो समय रुसले यस क्षेत्रमा ड्रोन र क्षेप्यास्त्र आक्रमण तीव्र बनाउँदै आएको छ।

यो आक्रमण रुस–युक्रेनबीच युद्धविरामका लागि वार्ता हुने तयारी भइरहेका बेला भएको हो। युक्रेनी राष्ट्रपति भोलोदिमिर जेलेन्स्कीले फेब्रुअरी ४ र ५ मा अबु धाबीमा रुस र युक्रेनबीच अर्को चरणको वार्ता हुने पुष्टि गरेका छन्। उक्त वार्तामा अमेरिकाको पनि सहभागिता रहने अपेक्षा गरिएको छ।

जेलेन्स्कीले युक्रेन युद्ध अन्त्यका लागि ठोस र परिणाममुखी वार्ताको पक्षमा रहेको बताएका छन्। तर वार्ताको घोषणा नहुँदै सर्वसाधारण मजदुर बोकेको बस र अस्पतालजस्ता नागरिक संरचनामाथि आक्रमण हुनु रुसको नियतमाथि गम्भीर प्रश्न उठाउने खालको भएको युक्रेनी पक्षको भनाइ छ ।