निर्वाचन बहिष्कारका लागि पाँच कम्युनिस्ट पार्टीद्वारा दोस्रो चरणको आन्दोलन घोषणा
Prime TV News एक महिना अगाडि 
काठमाडौ । आगामी फागुन २१ गते हुने संसदीय निर्वाचन बहिष्कार गर्ने निर्णय गरेका पाँच कम्युनिष्ट पार्टीहरूले दोस्रो चरणको आन्दोलनका कार्यक्रम सार्वजनिक गरेका छन् ।
पाँच साना कम्युनिष्ट पार्टी सम्मिलित केन्द्रीय संयुक्त संघर्ष समितिले माघ २० गतेदेखि फागुन ३ गतेसम्म सञ्चालन हुने संघर्षका कार्यक्रम घोषणा गरेको हो । समितिका संयोजक सीपी गजुरेलद्वारा मंगलबार जारी विज्ञप्तिअनुसार दोस्रो चरणको आन्दोलन अन्तर्गत पर्चा वितरण, भित्तेलेखन, घरदैलो अभियान तथा कोणसभाहरू आयोजना गरिने छन् ।
माघ १७ गते बसेको समितिको बैठकले यी कार्यक्रम तय गरेको र त्यसको मूर्त योजना तथा कार्यान्वयन स्थानीय संयुक्त संघर्ष समितिहरूले गर्ने जनाइएको छ । समितिले वर्तमान सरकारलाई ‘कठपुतली सरकार’ को संज्ञा दिँदै स्वाधीन संयुक्त जनसरकार गठन र जनसंविधान निर्माणको संघर्षलाई अघि बढाउन निर्वाचन बहिष्कार आवश्यक रहेको निष्कर्ष निकालेको छ ।
साथै समितिले देशभक्त, प्रगतिशील तथा वामपन्थी शक्तिसहित मजदुर, किसान, कर्मचारी र राष्ट्रिय पुँजीपति वर्गलाई समेत बहिष्कार अभियानमा सहभागी हुन अपिल गरेको छ । यसैबीच, निर्वाचन बहिष्कार अभियानका क्रममा आफ्ना नेता पक्राउ परेको भन्दै समितिले आपत्ति जनाएको छ ।
अभियानकै सिलसिलामा क्रान्तिकारी कम्युनिष्ट पार्टी नेपालका केन्द्रीय सदस्य पूर्णबहादुर खड्कालाई सिन्धुलीको दुधौलीबाट प्रहरीले पक्राउ गरेको उल्लेख गर्दै समितिले उनको तत्काल रिहाइको माग गरेको छ ।
केन्द्रीय संयुक्त संघर्ष समितिमा क्रान्तिकारी कम्युनिष्ट पार्टी नेपाल, नेपाल कम्युनिष्ट पार्टी (बहुमत), वैज्ञानिक समाजवादी कम्युनिष्ट पार्टी नेपाल, नेपाल कम्युनिष्ट पार्टी तथा नेपाल कम्युनिष्ट पार्टी (जनपक्ष) आबद्ध रहेका छन् ।
