मुम्बई विमानस्थलमा एयर इन्डिया र इन्डिगो विमानको ट्याक्सी–वेमा टक्कर, यात्रु सुरक्षित
Prime TV News एक महिना अगाडि 
काठमाडौ । मुम्बई अन्तर्राष्ट्रिय विमानस्थलमा मंगलबार अपराह्न एयर इन्डिया र इन्डिगोका विमानको पखेटा एकआपसमा ठोक्किने घटना भएको छ। दुबै एयरलाइन्सले छुट्टाछुट्टै विज्ञप्ति जारी गर्दै यस घटनाको पुष्टि गरेका छन्।
घटनामा इन्डिगोको हैदराबाद–मुम्बई उडान ‘६ई ७९१’ र एयर इन्डियाको मुम्बई–कोयम्बतुर उडान ‘एआई २७३२’ संलग्न थिए। समाचार अनुसार, इन्डिगो विमान अवतरणपछि ट्याक्सी–वेमा गुडिरहेको थियो भने एयर इन्डियाको विमान उडान भर्नु अघि ट्याक्सी–वेमा पालो पर्खिरहेको अवस्थामा दुबै विमानको पखेटा ठोक्किएका हुन्।
इन्डिगोका प्रवक्ताले भनेका छन्, “सबै यात्रु सुरक्षित छन्। विमान पार्किङ भएपछि उनीहरूलाई ओरालिएको छ र हाल मर्मतसम्भार तथा निरीक्षण भइरहेको छ।” एयर इन्डियाले भने कि विमानको विंकटिपमा क्षति पुगेको कारण उडान ढिला भएको छ र थप प्राविधिक जाँचका लागि विमान ग्राउन्डेड गरिएको छ।
कम्पनीले यात्रुहरूलाई वैकल्पिक उडान र अन्य व्यवस्थाका माध्यमबाट उनीहरूको गन्तव्यसम्म पुर्याइरहेको जनाएको छ। प्रोटोकल अनुसार सम्बन्धित अधिकारीहरूलाई जानकारी दिइएको छ र घटनाबारे अनुसन्धान भइरहेको छ। विशेषज्ञहरूले यो घटना ट्याक्सी वेमा विमानहरूको नियमन र सतर्कता पालनामा ध्यान दिनुपर्ने आवश्यकतालाई संकेत गर्ने गरेको बताएका छन्।
