आईसीसी टी–२० विश्वकप आजबाट औपचारिक रूपमा सुरु, २० टोली उपाधि दौडमा

Prime TV News ३ हप्ता अगाडि

काठमाडौ । आईसीसी टी–२० पुरुष विश्वकप क्रिकेटको १०औँ संस्करण आजदेखि सुरु भएको छ। भारत र श्रीलङ्काले संयुक्त रूपमा आयोजना गरेको प्रतियोगितामा विश्वका २० टोली सहभागी भएका छन्।

विश्वकपको उद्घाटन खेलमा पाकिस्तान र नेदरल्याण्ड्स आमनेसामने भएका छन्। श्रीलङ्काको कोलम्बोस्थित सिंहाली स्पोर्ट्स क्लब क्रिकेट मैदानमा पाकिस्तानले टस जितेर फिल्डिङ रोजेपछि नेदरल्याण्ड्सले पहिला ब्याटिङ गरेको छ।

आजै दुई अन्य खेल पनि हुँदैछन्। दिउँसो सवा ३ बजे भारतको कोलकातास्थित इडेन गार्डेनमा वेस्ट इन्डिज र स्कटल्यान्ड खेल्नेछन्। यस्तै, साँझ सवा ७ बजे मुम्बईको वानखेडे रंगशालामा आयोजक भारत र अमेरिका भिड्नेछन्।

विश्वकपमा सहभागी टोलीहरूलाई चार समूहमा विभाजन गरिएको छ। समूह ‘ए’ मा भारत, पाकिस्तान, अमेरिका, नामिबिया र नेदरल्याण्ड्स रहेका छन्। समूह ‘बी’ मा अस्ट्रेलिया, श्रीलङ्का, जिम्बावे, आयरल्यान्ड र ओमान छन्।

समूह ‘सी’ मा नेपालसहित इङ्ग्ल्यान्ड, वेस्ट इन्डिज, स्कटल्यान्ड र इटाली परेका छन्। नेपालका लागि यो समूह चुनौतीपूर्ण छ, तर इतिहास बनाउने अवसर पनि यही हो। समूह ‘डी’ मा दक्षिण अफ्रिका, न्युजिल्यान्ड, अफगानिस्तान, यूएई र क्यानडा रहेका छन्।