खुलना मतदान केन्द्रमा झडप, बीएनपी नेताको मृत्यु

Prime TV News २ हप्ता अगाडि

काठमाडौ । बंगलादेशमा भइरहेको संसदीय निर्वाचनका क्रममा खुलना सदरस्थित आलिया मदरसा मतदान केन्द्रमा दुई समूहबीच झडप हुँदा बंगलादेश नेसनलिस्ट पार्टीका नेता मोहिबुज्जमान कोचीको मृत्यु भएको छ।

अन्तर्राष्ट्रिय सञ्चारमाध्यमहरूका अनुसार खुलना मेट्रोपोलिटन बीएनपीका पूर्वसचिवसमेत रहेका कोची बिहान भएको विवादपछि गम्भीर बिरामी परेका थिए। उनलाई तत्काल खुलना सिटी मेडिकल कलेज अस्पताल लगिएको थियो, जहाँ चिकित्सकहरूले मृत घोषणा गरेका थिए।

खुलना–२ निर्वाचन क्षेत्रका बीएनपी उम्मेदवारका मुख्य प्रतिनिधि मोहम्मद मोनिरुज्जमान मोनीले बिहान करिब ८ बजे मतदान केन्द्रमा प्रचारप्रसारको विषयलाई लिएर विवाद सुरु भएको बताएका छन्। उनका अनुसार विवादका क्रममा कोचीलाई धक्का लागेर रूखमा ठोक्किँदा उनको स्वास्थ्य अवस्था बिग्रिएको थियो।

यद्यपि खुलना महानगर प्रहरी (केएमपी) का आयुक्त मोहम्मद जहीदुल हसनले घटनाको पुष्टि गरे पनि कोची रूखमा ठोक्किएका थिए वा थिएनन् भन्ने विषयमा स्पष्ट विवरण नआएको बताएका छन्। प्रहरीले घटनाबारे थप अनुसन्धान भइरहेको जनाएको छ।

विद्यार्थी आन्दोलनपछि तत्कालीन प्रधानमन्त्री शेख हसिना अपदस्त भएको १८ महिनापछि बंगलादेशमा आम निर्वाचन भइरहेको हो। देशभरका ४२ हजार ७७९ मतदान केन्द्रमा बिहान ७:३० बजेदेखि मतदान सुरु भएको छ, जुन अपराह्न ४:३० बजेसम्म जारी रहनेछ।

निर्वाचन आयोगका अनुसार यसपटक १२ करोड ७७ लाख मतदाता छन्, जसमा ६ करोड ४८ लाख पुरुष र ६ करोड २८ लाख महिला रहेका छन्। प्रतिनिधि सभाका ३०० सिटमध्ये २९९ सिटमा मतदान भइरहेको छ भने एक उम्मेदवारको निधनपछि शेर्पुर–३ क्षेत्रमा मतदान स्थगित गरिएको छ।

निर्वाचनसँगै ‘जुलाई नेसनल चार्टर’ सम्बन्धी जनमत संग्रह पनि भइरहेको छ। उक्त चार्टरमा संविधान संशोधन, राज्यका तीन अंगबीच शक्ति सन्तुलन, निर्वाचन प्रणाली सुधार, मानवअधिकार संरक्षण तथा भ्रष्टाचार नियन्त्रणसम्बन्धी व्यवस्था समेटिएको छ।

निर्वाचन शान्तिपूर्ण बनाउन करिब १० लाख सुरक्षाकर्मी परिचालन गरिएको छ। सेना, प्रहरी, बोर्डर गार्ड, र्‍यापिड एक्शन बटालियन, अन्सार तथा अन्य सुरक्षा निकाय मतदान केन्द्रहरूमा खटिएका छन्। सशस्त्र बललाई ‘इन एड टु सिभिल पावर’ प्रावधानअन्तर्गत नागरिक प्रशासनलाई सहयोग गर्न परिचालन गरिएको हो।

यसपटक ५० दलका १ हजार ७५५ उम्मेदवार र २७३ स्वतन्त्र उम्मेदवार चुनावी मैदानमा छन्। मुख्य प्रतिस्पर्धा तारिक रहमान नेतृत्वको बीएनपी र जमात–ए–इस्लामी नेतृत्वको गठबन्धनबीच भइरहेको छ। अघिल्लो आन्दोलनका क्रममा भएको दमनमा संलग्न रहेको आरोपमा अवामी लिगलाई निर्वाचनमा भाग लिन प्रतिबन्ध लगाइएको छ।