रारा विमानस्थलमा चार महिनापछि नेपाल एयरलाइन्स

Prime TV News १ हप्ता अगाडि

काठमाडौ (रासस) । मुगुको रारा विमानस्थलमा चार महिनापछि नेपाल एयरलाइन्सले उडान भरेको छ। नेपाल सरकारको स्वामित्वमा रहेको नेपाल एयरलाइन्सको विमान आज चार महिनापछि रारा विमानस्थलमा अवतरण भएको छ। यसअघि गत वैशाख महिनासम्म रारा विमानस्थलमा हप्ताको तीन दिन उडान हुँदै आएको थियो।

नियमित उडान हुँदा मुगालीहरुले राहत महसुस गरेका थिए। तर चार महिनायता उडान नहुँदा यो विमानस्थल भएर नेपालकै ठूलो ताल राराताल घुम्न आउने पर्यटक र अन्य यात्रुले हवाई यात्राका लागि सास्ती भोग्दै आएका थिए।

आजदेखि नेपाल एयरलाइन्सले रारा विमानस्थलमा पुनः उडान सुरु भएको नेपाल एयरलाइन्स रारा विमानस्थल कक्षका प्रमुख नवीनकुमार विष्टले जानकारी दिए । नेपालगञ्ज उपचारका लागि जान लागेकी यात्रु सुमित्रा रावललेनियमित उडान गरिदिए दुर्गमका जनताले राहत पाउने बताइन्।

विविध कारणले नियमित उडान नभए पनि अब नियमित उडानका लागि आफ्नो तर्फबाट पहल गर्ने प्रमुख विष्टले बताए। रारा विमानस्थलमा समिट एयर, तारा एयर, सीता एयर र नेपाल एयरलाइन्सले उडान भर्दै आएका छन्।