तथ्यांकले काठमाडौंको हावामा पीएम २.५ को मात्रा विश्व स्वास्थ्य संगठनको मापदण्डभन्दा १६.५ गुणासम्म बढी रहेको देखाएको छ। सूक्ष्म कणयुक्त धूलो फोक्सोमार्फत रगतसम्म पुग्ने भएकाले दीर्घकालीन स्वास्थ्य समस्या निम्त्याउन सक्ने चिकित्सकहरू चेतावनी दिन्छन्।

उपत्यकाभित्र त्रिपुरेश्वर, बालकोट, कोटेश्वर र कुमारीपाटी क्षेत्रमा सबैभन्दा उच्च प्रदूषण मापन गरिएको छ। सुख्खा मौसम, बढ्दो सवारी चाप, निर्माण कार्य र सडकको धूलो प्रदूषण बढ्नुका मुख्य कारणका रूपमा औंल्याइएको छ।

प्रदूषणको स्तर बढेसँगै स्वास्थ्यकर्मीहरूले अत्यावश्यक कामबाहेक बाहिर ननिस्कन, बाहिर निस्कँदा मास्क प्रयोग गर्न, झ्यालढोका बन्द राख्न तथा सम्भव भएसम्म एयर प्युरिफायर प्रयोग गर्न सुझाव दिएका छन्। विशेषगरी बिहान–बेलुका खुला ठाउँमा व्यायाम वा मोर्निङ वाक नगर्न आग्रह गरिएको छ।

विश्वका सबैभन्दा प्रदूषित सहरहरूको सूचीमा पाकिस्तानको लाहोर पहिलो स्थानमा रहेको छ, जहाँ एक्यूआई ४१२ पुगेको छ। त्यसैगरी ढाका दोस्रो, नयाँ दिल्ली तेस्रो र कोलकाता चौथो स्थानमा रहेका छन्।