रुकुम पश्चिममा चुनावी समीकरण फेरियो, जनार्दन शर्मालाई उज्यालो नेपाल पार्टी र एमालेको समर्थन
Prime TV News ५ दिन अगाडि 
काठमाडौ । रुकुम पश्चिममा प्रतिनिधिसभा निर्वाचनको पूर्वसन्ध्यामा चुनावी समीकरण अप्रत्याशित रूपमा बदलिएको छ। प्रगतिशील लोकतान्त्रिक पार्टीका उम्मेदवार जनार्दन शर्मा लाई उज्यालो नेपाल पार्टी ले औपचारिक समर्थन गरेको छ।
उज्यालो नेपाल पार्टीका उम्मेदवार नरेन्द्र केसीले आफ्नो उम्मेदवारी निष्क्रिय पार्दै शर्मालाई समर्थन गर्ने घोषणा गरेका हुन्। उनले “वाम–लोकतान्त्रिक शक्तिहरूबीच सहकार्य आवश्यक रहेको” उल्लेख गर्दै मत विभाजन रोक्न आफूले यस्तो निर्णय लिएको बताए।
यसअघि नेकपाका संयोजक पुष्पकमल दाहाल (प्रचण्ड) को साथ छाडेपछि शर्मा पहिलो पटक नयाँ राजनीतिक पृष्ठभूमिमा चुनावी मैदानमा उत्रिएका हुन्। उनी तत्कालीन माओवादी केन्द्र बाट २०६४ सालदेखि लगातार चुनाव जित्दै आएका थिए।
रुकुम पश्चिममा यसपटक बहुदलीय प्रतिस्पर्धा देखिएको छ। नेकपा एमालेका तर्फबाट नन्दराम देवकोटा, नेपाली कांग्रेसका राजु केसी, नेपाल कम्युनिष्ट पार्टी (नेकपा) का गोपाल शर्मा तथा राष्ट्रिय स्वतन्त्र पार्टी का मानबहादुर शाही चुनावी प्रतिस्पर्धामा छन्।
यसैबीच, एमालेले समेत जनार्दन शर्मालाई समर्थन गर्ने निर्णय गरेपछि रुकुम पश्चिमको चुनावी प्रतिस्पर्धा थप रोचक बनेको छ। विभिन्न दलबीचको समर्थन र उम्मेदवारी निष्क्रिय पार्ने रणनीतिले मतदाताको धारणा कता मोडिन्छ भन्ने विषयमा चासो बढेको छ।
राजनीतिक विश्लेषकहरूका अनुसार पछिल्ला समर्थन घोषणाले जनार्दन शर्माको पक्षमा बलियो माहोल सिर्जना हुन सक्ने संकेत देखिएको छ, यद्यपि अन्तिम निर्णय भने मतदाताकै हातमा रहनेछ।
