मधेसको अनुभवले राजनीतिमा मेरो भूमिका अझ परिपक्व बनायोः गगन थापा

Prime TV News एक घण्टा अगाडि

काठमाडौ । नेपाली कांग्रेसका सभापति गगन थापाले प्रतिनिधि सभा सदस्य निर्वाचन अन्तर्गत बिहीबार काठमाडौँको मैतीदेवी मन्दिर स्थित मतदान केन्द्रबाट मतदान गरेका छन्।

यसपटक सर्लाही क्षेत्र नम्बर ४ बाट उम्मेदवार रहेका थापाले मतदानपछि सञ्चारकर्मीहरूसँग कुरा गर्दै मधेसको अनुभवले आफ्नो राजनीतिक दृष्टिकोण फराकिलो र परिपक्व भएको बताएका छन् । थापाले भने, “काठमाडौँबाट लामो समय राजनीति गर्दा देशको बारेमा मेरो बुझाइ केही प्रतिशत मात्रै रहेछ। मधेसको अनुभवले म समाजको विविधता, संरचना र स्थानीय समस्यालाई नजिकबाट बुझ्न सफल भएँ। यसले राष्ट्रिय राजनीतिमा मेरो भूमिका अझ परिपक्व बनायो।”

उनले मधेस नगएको भए आफ्नो राजनीतिक बुझाइ अधुरो रहने बताए र थपे, “मधेसको अनुभव नगरेको भए आज मैले बुझेको कुरा मेरो राजनीतिक बुझाइको आधा पनि हुने थिएन।” थापाले आफूले प्रतिनिधित्व गर्ने अवसर पाएमा नीति निर्माण र निर्णय प्रक्रियामा सबै क्षेत्रलाई समान दृष्टिकोणले हेर्ने प्रतिबद्धता व्यक्त गरे।

बिहीबार देशभर प्रतिनिधि सभा र प्रदेशसभा सदस्यको निर्वाचन भइरहेको छ।