दूतावासले सामाजिक सञ्जाल मार्फत जारी गरेको सन्देशमा इरान र उसका सहयोगी मिलिसिया समूहहरूले इराकमा सार्वजनिक सुरक्षामाथि गम्भीर खतरा उत्पन्न गरिरहेको उल्लेख गरेको छ। सन्देशमा अमेरिकी नागरिक, अमेरिकी हित तथा महत्त्वपूर्ण पूर्वाधारलाई लक्षित गरी आक्रमणहरू भइरहेका दाबी गरिएको छ।

आक्रमणपछि दूतावास परिसरबाट बाक्लो धुवाँ उठिरहेको दृश्य सामाजिक सञ्जालमा सार्वजनिक भएको भिडियोमा देखिएको छ। सुरक्षा जोखिम उच्च रहेको भन्दै दूतावासले बगदादस्थित दूतावास वा अर्बिलस्थित अमेरिकी महावाणिज्य दूतावासमा आउन प्रयास नगर्न पनि चेतावनी दिएको छ।

दूतावासले इराकको हवाई क्षेत्रमा रकेट, ड्रोन र मोर्टार आक्रमणको जोखिम निरन्तर रहेको भन्दै अमेरिकी नागरिकहरूलाई अत्यन्त सावधानी अपनाउन र सकेसम्म चाँडो सुरक्षित स्थानतर्फ जान आग्रह गरेको छ।