कांग्रेसले पराजयको समीक्षा गर्न प्रदेश–जिल्ला स्तरमा समिति गठन गर्न निर्देशन

Prime TV News एक महिना अगाडि

काठमाडौ । नेपाली कांग्रेसले प्रतिनिधि सभा सदस्य निर्वाचनमा अपेक्षित नतिजा नआएको भन्दै पराजयका कारणको विस्तृत समीक्षा प्रतिवेदन माग गरेको छ।

पार्टी केन्द्रीय कार्यालयले सबै प्रदेश, जिल्ला कार्यसमिति र उम्मेदवारहरूलाई तत्काल अनुशासन समिति गठन गरी हारको कारण पहिचान गर्न निर्देशन दिएको हो। परिपत्र महामन्त्रीद्वय गुरुराज घिमिरे र प्रदीप पौडेल द्वारा हस्ताक्षरित छ।

परिपत्रमा फागुन २१ गते सम्पन्न निर्वाचनको परिणाम निराशाजनक रहेको उल्लेख गर्दै आत्मसमीक्षा गर्न आग्रह गरिएको छ। विधान, २०१७ को धारा ३४ अनुसार जिल्ला र प्रदेश अनुशासन समिति गठन नगरेको भए तत्काल गठन गरी संयोजक तथा सदस्यहरूको नाम र सम्पर्क विवरण केन्द्रीय कार्यालयमा पठाउन निर्देशन दिइएको छ।

प्रदेश, जिल्ला र उम्मेदवारहरूले पराजयका कारण, अनुभव, सुझाव र आगामी सुधारका विषयहरू समेटेर विस्तृत प्रतिवेदन पठाउनुपर्ने छ। केन्द्रीय कार्यालयले यसका लागि आगामी चैत्र ३ लाई अन्तिम समयसीमा तोकेको छ।