मेसीले व्यावसायिक फुटबल करियरमा ९०० गोलको ऐतिहासिक कोसेढुङ्गा पार
Prime TV News एक महिना अगाडि 
काठमाडौ । अर्जेन्टिनी फुटबलर लियोनेल मेसीले व्यावसायिक फुटबल करियरमा ९०० गोलको ऐतिहासिक कोसेढुङ्गा पार गरेका छन्।
बुधबार राति ‘कन्काकाफ च्याम्पियन्स कप’ अन्तर्गत नासभिल एससीविरुद्धको खेलमा गोल गर्दै यो सफलता पाएका हुन् । ३८ वर्षीय मेसी यो उपलब्धि हासिल गर्ने विश्वकै दोस्रो खेलाडी बनेका छन्।
टेनेसीस्थित जियोडिस पार्कमा भएको अन्तिम १६ को दोस्रो लेगको खेलमा मेसीले सातौँ मिनेटमै गोल गर्दै यो दुर्लभ कीर्तिमान रचेका हुन्।
सन् २०२३ जुनमा इन्टर मायामीमा आबद्ध भएयता उनले ९२ खेलमा ८१ गोल गरिसकेका छन्। उनको उत्कृष्ट प्रदर्शनकै मद्दतमा मायामीले ‘लिग कप’ र ‘एमएलएस कप’ को उपाधि समेत उचालेको छ।
मेसीको गोल गर्ने यात्रा सन् २००५ मे महिनाबाट सुरु भएको हो। १७ वर्ष १० महिना ७ दिनको उमेरमा अल्बासेटेविरुद्ध बार्सिलोनाका लागि पहिलो गोल गर्दा उनी क्लब इतिहासकै कान्छा गोलकर्ता बनेका थिए।
