हावाहुरी र वर्षाको जोखिम बढ्यो, कर्णाली–सुदूरपश्चिममा भारी वर्षा र हिमपातको चेतावनी

Prime TV News एक महिना अगाडि

काठमाडौ । देशभर आज मौसम प्रतिकूल हुने देखिएको छ। जल तथा मौसम विज्ञान विभागका अनुसार पश्चिमी न्यूनचापीय प्रणाली र स्थानीय वायु सक्रिय हुँदा हावाहुरीसहित वर्षा हुने सम्भावना बढेको हो।

दिउँसो अधिकांश स्थानमा बादल लाग्ने र कर्णाली तथा सुदूरपश्चिम प्रदेशका धेरै स्थानमा वर्षा हुने अनुमान गरिएको छ। गण्डकी, लुम्बिनी र कोसी प्रदेशका पहाडी तथा हिमाली भूभागका केही स्थानमा पनि मेघगर्जन, चट्याङ र असिनासहित मध्यम वर्षा हुने सम्भावना रहेको छ। उच्च भूभागमा हिमपातको सम्भावना समेत रहेको विभागले जनाएको छ।

विशेषगरी कर्णाली र सुदूरपश्चिमका केही स्थानमा भारी वर्षा र हिमपात हुन सक्ने चेतावनी दिइएको छ। रातिको समयमा पनि मौसम पूर्ण रूपमा सुधार नहुने र धेरै स्थानमा वर्षा जारी रहने पूर्वानुमान छ।

यसैबीच, राष्ट्रिय विपद् जोखिम न्यूनीकरण तथा व्यवस्थापन प्राधिकरणले तीव्र हावाहुरीको जोखिम औंल्याउँदै सावधानी अपनाउन आग्रह गरेको छ। प्राधिकरणका अनुसार दाङ, नेपालगन्ज आसपास तथा भोलि पूर्वी क्षेत्रका विराटनगर, धनकुटा र धरान क्षेत्रमा करिब ११९ किलोमिटर प्रतिघण्टासम्मको वेगमा हावाहुरी चल्न सक्छ।