सनराइजर्स हैदराबादले कोलकाता नाइट राइडर्समाथि शानदार जित

Prime TV News एक महिना अगाडि

काठमाडौ । आईपीएल अन्तर्गत भएको खेलमा सनराइजर्स हैदराबादले कोलकाता नाइट राइडर्समाथि शानदार जित निकालेको छ। हैदराबादले कोलकातालाई ६५ रनले पराजित गर्दै सिजनको पहिलो जित दर्ता गर्‍यो।

कोलकाताको घरेलु मैदान ईडेन गार्डेन्समा भएको खेलमा पहिले ब्याटिङ गरेको हैदराबादले २० ओभरमा ८ विकेट गुमाएर २२६ रन बनायो। ठूलो लक्ष्य पछ्याएको कोलकाता भने १६ ओभरमै १६१ रनमा समेटियो।

हैदराबादको जितमा हेनरिक क्लासेनले अर्धशतक बनाउँदै ५२ रनको योगदान दिए। ट्राभिस हेडले ४६ रन र अभिषेक शर्माले ४८ रन बनाए। सुरुवातमै यी दुई ब्याट्सम्यानले आक्रामक खेल्दा टोलीले बलियो स्कोर खडा गर्न सफल भयो।

जवाफमा कोलकाताको सुरुवात राम्रो भए पनि त्यसलाई निरन्तरता दिन सकेन। अंगकृष रघुवंशीले ५२ रन बनाएर प्रयास गरे पनि टोलीलाई जिततर्फ लैजान सकेनन्। रिंकू सिंहले ३५ रन बनाए।हैदराबादका बलरहरूले उत्कृष्ट प्रदर्शन गरे। जयदेव उनादकटले ३ विकेट लिए भने ईशान मलिंगा र नीतीश कुमार रेड्डीले २–२ विकेट लिए।

कोलकाताका बलरमध्ये ब्लेसिङ मुजरबानीले ४ विकेट लिए पनि टोलीलाई हारबाट जोगाउन पर्याप्त भएन। यस जितसँगै हैदराबादले सिजनमा पहिलो सफलता पाएको छ भने कोलकाताले हार व्यहोर्नुपरेको छ।