चिनियाँ पक्षले नेपाली कन्टेनर नछाड्दा व्यापारिहरु समस्यामा

Prime TV News १ हप्ता अगाडि

काठमाडौ । सिन्धुपाल्चोकको तातोपानी नाकाबाट चिनियाँ पक्षले नेपाली कन्टेनर नछाड्दा समस्यामा परेको व्यापारिहरुले गुनासो गरेका छन् । लामो समयदेखि अबरुद्ध अरनिको राजमार्ग खुलेको अवस्थामा पनि चिनियाँ पक्षले नेपाली कन्टेनर नछाड्दा आफुहरु समस्यामा परेको उनीहरुले गुनासो गरेका छन् ।

चाडपर्वलाई लक्षित गरि नेपाल ल्याउन लागेको सामानहरु चीनतर्फ नै अड्किदा करौडौंको नोक्सानी हुने अवस्था आएको उनीहरुको भनाइ छ । ट्रान्स शिल्क टर्मिनलका निर्देशक अनिरुद्र थापाले चाइनातर्फबाट नेपाल आउने गाडीहरु सहज रुपमा आउन नसकेको बताए । उनले चाडपर्वलाई लक्षित गरि व्यवसायीहरुले मगाएका सामानहरु अड्किदा धेरै नोक्सानी हुने अवस्था देखिएको जिकिर गरे । औसतमा हरेक दिन ३० वटा कन्टेनर नेपाल आउने गरेकोमा अहिले निकै कम गाडीमात्र चिनियाँ पक्षले छाडेको ब्यापारीको भनाई छ ।

तातोपानी भन्सार सिन्धुपाल्चोकका सूचना अधिकारी रमेश शाहले तुलनात्मक रुपमा चीनबाट निकै कम गाडी आएकाले चिनियाँ पक्षसंग समन्वय भइरहेको बताए । चीनतर्फ प्रयाप्त जनशक्ति नभएकाले कम गाडी पठाएको जवाफ आएको भन्दै उनले छिटै सहज रुपमा गाडीहरु नेपाल आउने विश्वास व्यक्त गरे । 

सिन्धुपाल्चोकको भोटेकोशी गाउँपालिकाका बिभिन्न स्थानमा गएको पहिरोले अवरुद्ध अरनिको राजमार्ग केहिदिनअघि मात्रै खुलेको थियो । लामो समयपछि सडक खुल्दा पनि कन्टेनरहरु सहज रुपमा नेपाल भित्रन नसकेपछि व्यवसायीहरु चिन्तित भएका छन् ।