राप्रपा भित्र आन्तरिक विवाद चर्कियो, साताभित्र महाधिवेशनको मिति घोषणा गर्न अल्टिमेटम

Prime TV News ३ हप्ता अगाडि

काठमाडौ । राष्ट्रिय प्रजातन्त्र पार्टी भित्र आन्तरिक विवाद चर्किएको छ। महामन्त्री धवलशम्शेर राणा नेतृत्वको समूहले अध्यक्ष राजेन्द्र लिङ्देनको कार्यशैलीप्रति असन्तुष्टि जनाउँदै एक साताभित्र महाधिवेशनको मिति घोषणा गर्न अल्टिमेटम दिएको छ।

राणा समूहले हालको नेतृत्वले निर्वाचनको कमजोर नतिजाबारे जिम्मेवारी नलिएको आरोप लगाएको छ। उनीहरूले पार्टीलाई पुनर्जीवन दिन नयाँ नेतृत्व आवश्यक रहेको बताएका छन्। गत फागुन २१ को निर्वाचनमा अपेक्षाअनुसार परिणाम नआएको र त्यसपछि पनि नेतृत्वले समीक्षा नगरेको उनीहरूको भनाइ छ।

अध्यक्ष लिङ्देनले पार्टीलाई देशको पहिलो शक्ति बनाउने दाबी गरे पनि नतिजा त्यसअनुसार नआएको भन्दै आलोचना गरिएको छ। यसैबीच, उपसभामुख निर्वाचनमा पार्टीले लिएको निर्णयबारे पनि असन्तुष्टि देखिएको छ। पर्याप्त छलफल बिना निर्णय गरिएको भन्दै पार्टीको आन्तरिक प्रक्रिया मिचिएको आरोप लगाइएको छ।

राणा समूहले तीन बुँदे माग राख्दै एक साताभित्र माग पूरा नभए थप संघर्षका कार्यक्रम अघि बढाउने चेतावनी दिएको छ। यो घटनाले राप्रपाभित्र नयाँ विवाद र ध्रुवीकरण बढेको देखिएको छ।