कांग्रेस सभापति गगन थापाद्वारा सरकारलाई चेतावनी, न्यायिक छानबिनको माग

Prime TV News २ हप्ता अगाडि

काठमाडौ । नेपाली कांग्रेसका सभापति गगन थापाले सरकारले नागरिकका मागहरू बेवास्ता गरे कडा रूपमा प्रस्तुत हुने चेतावनी दिएका छन्। बुधबार विराटनगर विमानस्थलमा पत्रकारहरूसँग कुरा गर्दै उनले सरकारले कतिपय निर्णयहरू कानुन मिचेर र लहडका भरमा गरेको आरोप लगाए।

थापाले भदौ २४ गतेको घटनाको निष्पक्ष र न्यायिक छानबिन गर्न सरकारसँग माग गरे। उनले सरकारले मागहरू पूरा नगरे त्यसलाई अघि बढाउने र आवाज बलियो बनाउने उपाय कांग्रेसलाई थाहा भएको बताए। उनले भने, सरकारलाई अनुसन्धान गर्ने अधिकार भए पनि सबै काम कानुन अनुसार हुनुपर्नेमा जोड दिए। हाल सरकारले विधि र प्रक्रिया नमान्ने काम गरेको भन्दै उनले ध्यानाकर्षण गराइएको पनि बताए।

कांग्रेसको भूमिकाबारे उनले पार्टी संसदमा प्रतिपक्षमा भए पनि सातै प्रदेशमा सरकारमा सहभागी रहेको बताए। उनका अनुसार कांग्रेसले राम्रो कामको समर्थन गर्ने र जनहितका विषयमा भने सरकारलाई प्रश्न गर्ने नीति लिएको छ। उनले कांग्रेस जिम्मेवार प्रतिपक्षी भएको र अराजक शैलीमा नबोल्ने भएकाले कहिलेकाहीँ आवाज कम सुनिएको जस्तो लाग्न सक्ने पनि बताए।

गृहमन्त्री सम्बन्धी प्रश्नमा भने उनले पार्टीले यस विषयमा आधिकारिक धारणा पहिले नै दिइसकेको भन्दै थप टिप्पणी गर्न चाहेनन्। साथै, उनले पार्टीलाई एकताबद्ध रूपमा अघि बढाउने र आगामी महाधिवेशनमा सबैलाई एकै ठाउँमा लैजाने प्रतिबद्धता पनि व्यक्त गरे।