प्रतिनिधिसभा नियमावलीको नयाँ प्रावधानमा विवाद, विपक्षीले सच्याउन माग

Prime TV News २ हप्ता अगाडि

काठमाडौ । प्रतिनिधिसभा नियमावलीको मस्यौदामा राखिएको नयाँ प्रावधानलाई लिएर दलहरूबीच विवाद देखिएको छ। सभामुख डोलप्रसाद अर्यालले बुधबार प्रमुख सचेतकहरूसँग छलफल गरेका थिए। त्यसपछि विपक्षी दलहरूले राष्ट्रिय स्वतन्त्र पार्टी (रास्वपा) लाई नियम २५९ सच्याउन आग्रह गरेका छन्।

उक्त नियममा प्रतिनिधिसभा नियमावलीलाई संघीय कानुनसरह लागू हुने र विशेष कानुनजस्तो मानिने व्यवस्था राखिएको छ। साथै, सांसदहरूको हकमा यो विशेषाधिकारका रूपमा रहने उल्लेख छ। नेपाली कांग्रेस, नेकपा (एमाले) लगायतका विपक्षी दलका सांसदहरूले यो व्यवस्था कानुनसँग बाझिन सक्ने भन्दै आपत्ति जनाएका छन्। उनीहरूले नियमावलीलाई नियमावलीकै रूपमा सीमित राख्नुपर्ने सुझाव दिएका छन्।

छलफलमा सहभागी सांसदहरूले बहुमतको आधारमा मात्रै अघि नबढ्न र सबै दलसँग पुनः छलफल गर्न आग्रह गरेका छन्। उनीहरूले यो प्रावधानले फौजदारी कानुन र अन्य कानुनी प्रक्रियामा असर पार्न सक्ने भन्दै सच्याउनुपर्ने बताएका छन्। अब यस विषयमा दलहरूबीच थप छलफल हुने अपेक्षा गरिएको छ।