नेकपाको निर्णय: एकता टुंग्याउने देखि ५०% युवा अनिवार्य

Prime TV News ६ दिन अगाडि

काठमाडौ । नेपाली कम्युनिस्ट पार्टीले केन्द्रीय कार्यसंयोजक समिति बैठकपछि ७ बुँदे निर्णय सार्वजनिक गरेको छ। पार्टीका प्रवक्ता प्रकाश ज्वाला ले विज्ञप्ति जारी गर्दै महत्वपूर्ण निर्णयहरू सार्वजनिक गरेका हुन्।

बैठकले सबैभन्दा पहिले पार्टीको एकता प्रक्रिया अब ढिलो नगरी टुंग्याउने स्पष्ट निर्णय गरेको छ। वर्षौँसम्म लम्बिएको एकता प्रक्रिया आफैंमा कमजोर नेतृत्वको संकेत हो, त्यसैले अब ढिलाइ गर्ने ठाउँ नरहेको सन्देश दिइएको छ।

त्यस्तै, पार्टीले महाधिवेशनको मिति पनि तोकेको जनाएको छ। वडादेखि केन्द्रसम्मका सबै कमिटी अब निर्वाचित हुनेछन्, जसले पार्टीभित्रको जिम्मेवारी र उत्तरदायित्व स्पष्ट बनाउने अपेक्षा गरिएको छ।

पार्टी संरचनामा ठूलो परिवर्तन गर्दै समानुपातिक समावेशी आधारमा कमिटी निर्माण गरिने निर्णय गरिएको छ। अझ महत्वपूर्ण कुरा, हरेक कमिटीमा कम्तीमा ५० प्रतिशत युवा अनिवार्य राखिने छ।

त्यसैगरी, अनुभवी, पौढ र युवा सबैलाई समेटेर सन्तुलित नेतृत्व बनाउने भनिएको छ। पार्टीले पुनर्गठन प्रक्रिया अघि बढाउँदै सिंगो कम्युनिष्ट आन्दोलनलाई पनि पुनः सक्रिय बनाउने योजना बनाएको छ।

साथै, पार्टीका नेता तथा कार्यकर्तालाई उत्पादन र श्रमसँग जोड्ने अभियान सञ्चालन गरिने निर्णय गरिएको छ। यदि यो साँच्चिकै लागू भयो भने मात्र जनतासँग सम्बन्ध बलियो हुन्छ, नत्र यो पनि खोक्रो नारा बन्ने खतरा स्पष्ट छ।

समग्रमा, निर्णयहरू कडा र आकर्षक छन्। तर नेपालको राजनीति हेर्दा, निर्णयभन्दा कार्यान्वयन कमजोर हुने पुरानो रोग हो—यो फेरि दोहोरियो भने यी सबै कुरा केवल भाषणमै सीमित हुनेछन्।