संसद्को मर्यादामाथि प्रश्न उठाउने प्रधानमन्त्रीको व्यवहार

Prime TV News २ दिन अगाडि

काठमाडौ । राष्ट्रपति राष्ट्रपति रामचन्द्र पौडेलले संसद्को संयुक्त बैठकमा सरकारको वार्षिक नीति तथा कार्यक्रम प्रस्तुत गरिरहँदा प्रधानमन्त्री बालेन्द्र शाह बीचैमा बैठक छाडेर बाहिरिएको घटनाले राजनीतिक वृत्तमा व्यापक चर्चा सुरु भएको छ। विपक्षी दलहरूले यसलाई संसदीय मर्यादाविपरीतको व्यवहार भन्दै आलोचना गरेका छन्।

संसदीय लोकतन्त्रमा संसद्भित्रको आचरण, व्यवहार र उपस्थितिलाई विशेष महत्त्वका साथ हेरिन्छ। राष्ट्राध्यक्षले सम्बोधन गरिरहेका बेला प्रधानमन्त्री जस्तो उच्च पदका व्यक्तिले बैठक छाड्नु अस्वाभाविक र असंसदीय व्यवहारका रूपमा लिइएको छ। विपक्षी दलहरूको भनाइमा यस्तो कदमले संसद् र राष्ट्रपतिको गरिमामाथि प्रश्न उठाएको छ।

संसद्को संयुक्त बैठकलाई विशेष समारोहका रूपमा लिने परम्परा छ। राष्ट्रपतिको आगमनदेखि सम्बोधनसम्मका गतिविधि संसदीय परम्परा र सम्मानसँग जोडिएका हुन्छन्। यस्तो समयमा प्रधानमन्त्री बाहिरिनुले सरकारकै नीति तथा कार्यक्रमप्रति अनादर देखिएको टिप्पणी पनि हुन थालेको छ।

प्रधानमन्त्रीको दल राष्ट्रिय स्वतन्त्र पार्टीले भने अहिलेसम्म यस घटनाबारे औपचारिक धारणा सार्वजनिक गरेको छैन। राजनीतिक विश्लेषकहरूले भने प्रधानमन्त्रीले संसद्मा स्पष्टीकरण दिनु उपयुक्त हुने बताएका छन्। पूर्वसंसदीय अभ्यासहरू हेर्दा लोकतान्त्रिक मुलुकहरूमा राष्ट्राध्यक्षको सम्बोधनका क्रममा अमर्यादित व्यवहारलाई गम्भीर रूपमा लिने गरिएको पाइन्छ। कतिपय अवस्थामा माफी माग्नुपर्ने वा कारबाहीसमेत भएका उदाहरण छन्।

यस घटनाले संसद्को मर्यादा, सरकारको जिम्मेवारी र संसदीय परम्पराबारे नयाँ बहस सुरु गराएको छ। राजनीतिक दलहरूबीच विवाद बढे संसद्को नियमित कामकारबाहीसमेत प्रभावित हुन सक्ने देखिएको छ।