इरानबारे ट्रम्पको नयाँ संकेत, २० वर्ष परमाणु कार्यक्रम रोकिए स्वीकार्य हुने
Prime TV News ४४ मिनेट अगाडि 
काठमाडौ । अमेरिकी राष्ट्रपति डोनाल्ड ट्रम्पले इरानले आफ्नो परमाणु कार्यक्रम २० वर्षका लागि रोक्न तयार भए त्यसलाई स्वीकार गर्न सकिने बताएका छन् ।
ट्रम्पको यो भनाइलाई इरानको परमाणु कार्यक्रम पूर्ण रूपमा अन्त्य हुनुपर्ने उनको पुरानो अडानबाट केही नरम भएको संकेतका रूपमा हेरिएको छ ।
चिनियाँ राष्ट्रपति राष्ट्रपति सी चिनफिङसँग बेइजिङमा भेटवार्ता गरेपछि पत्रकारहरूसँग कुरा गर्दै ट्रम्पले अमेरिका र चीन दुवै इरानलाई आणविक हतियार बनाउन दिन नहुने विषयमा सहमत रहेको बताएका थिए ।
उनले इरानले बन्द गरेको होर्मुज जलमार्ग पुनः खोलिनुपर्ने पनि बताएका छन् । उक्त जलमार्ग अवरुद्ध भएपछि अन्तर्राष्ट्रिय बजारमा तेलको मूल्य बढिरहेको छ ।
पत्रकारहरूले २० वर्षको समय पर्याप्त हुन्छ कि हुँदैन भन्ने प्रश्न गर्दा ट्रम्पले “यदि ग्यारेन्टी बलियो हुन्छ भने २० वर्ष पर्याप्त हुन्छ” भन्ने प्रतिक्रिया दिएका थिए ।
यसअघि ट्रम्पले इरानलाई युरेनियम प्रवर्द्धन स्थायी रूपमा बन्द गर्नुपर्ने अडान राख्दै आएका थिए । तर पछिल्ला वार्तामा ठूलो प्रगति नभएपछि उनले आफ्नो धारणा केही नरम बनाएको विश्लेषण भइरहेको छ ।
यसै वर्ष फेब्रुअरीमा अमेरिका र इजरायलले इरानमाथि संयुक्त हवाई हमला गरेका थिए । त्यसपछि युद्धविराम लागू भए पनि पूर्ण रूपमा शान्ति स्थापना हुन सकेको छैन ।
इरानले युद्ध अन्त्यका लागि अमेरिकी नाकाबन्दी हटाउनुपर्ने, युद्ध तुरुन्त रोक्नुपर्ने र भविष्यमा आक्रमण नहुने ग्यारेन्टी माग गरेको बताइएको छ ।
