पश्चिमी वायुको प्रभावः देशका विभिन्न क्षेत्रमा वर्षा र हावाहुरीको सम्भावना

Prime TV News २ दिन अगाडि

काठमाडौ । हाल देशभर पश्चिमी वायु र स्थानीय वायुको प्रभाव देखिएको छ। मौसम पूर्वानुमान महाशाखाका अनुसार अहिले गण्डकी, बागमती र कोशी प्रदेशका केही स्थानमा वर्षा भइरहेको छ।

महाशाखाले आज दिउँसो कोशी प्रदेशसहित बागमती, गण्डकी र कर्णाली प्रदेशका हिमाली तथा पहाडी भूभागमा सामान्यदेखि आंशिक बदली रहने जनाएको छ। कोशी प्रदेशका केही स्थान तथा बागमती, गण्डकी र कर्णाली प्रदेशका थोरै स्थानमा चट्याङसहित मध्यम वर्षाको सम्भावना रहेको छ। उच्च हिमाली क्षेत्रमा हिमपातसमेत हुन सक्ने बताइएको छ।

यस्तै, मधेस प्रदेश, लुम्बिनी र सुदूरपश्चिम प्रदेशका पहाडी भूभाग तथा कोशी प्रदेशको तराई क्षेत्रमा पनि एक–दुई स्थानमा वर्षा हुन सक्ने अनुमान गरिएको छ। मधेस र कोशी प्रदेशको तराई क्षेत्रमा हावाहुरी चल्ने सम्भावना रहेको महाशाखाले जनाएको छ।

महाशाखाका अनुसार सुदूरपश्चिम र लुम्बिनी प्रदेशका केही क्षेत्रमा तापक्रम बढ्न सक्ने देखिएको छ। अत्यधिक गर्मीले जनजीवन प्रभावित हुन सक्ने भएकाले सतर्क रहन आग्रह गरिएको छ।