आफ्नो कारण पार्टी सदस्यको शिर निहुरिन नदिने गगन थापाको भनाइ

Prime TV News एक दिन अगाडि

काठमाडौ । नेपाली कांग्रेसका सभापति गगनकुमार थापाले आफ्नो व्यवहार र निर्णयका कारण पार्टीका कुनै पनि सदस्यलाई अप्ठ्यारो नपरोस् भन्ने बताएका छन्।

काभ्रेको धुलिखेलमा आयोजित वाग्मती प्रदेशस्तरीय भेलामा बोल्दै उनले आफू कांग्रेसको सभापति भएकाले आफ्नो व्यक्तिगत जीवन, आचरण र निर्णयका कारण कुनै पनि सदस्यले लज्जित हुन नपरोस् भन्ने धारणा राखे।

थापाले भने, “गगन थापा यो पार्टीको सभापति हो, उसको निर्णय, व्यक्तिगत जीवन र व्यवहारका कारण म कांग्रेस भएकोले मलाई अप्ठ्यारो पर्‍यो भन्न दिन्न।” उनले पार्टीका जिम्मेवार पदमा बसेकाहरूको व्यवहार गलत भए सहन नसकिने पनि बताए।

थापाले सत्यको पक्षमा उभिँदा आलोचना र गाली सहनुपरे पनि आफू सत्यकै पक्षमा रहने प्रतिबद्धता व्यक्त गरे।