पहाडी क्षेत्रमा वर्षाको सम्भावना, तराईमा गर्मी बढ्ने
Prime TV News २ दिन अगाडि 
काठमाडौ । नेपालमा अहिले पश्चिमी न्यून चापीय प्रणाली र स्थानीय वायुको प्रभाव देखिएको छ । मौसम पूर्वानुमान महाशाखा का अनुसार यसका कारण देशका धेरै पहाडी क्षेत्रमा बादल लाग्ने र केही ठाउँमा वर्षा हुने सम्भावना रहेको छ ।
हाल कोशी र सुदूरपश्चिम प्रदेशका हिमाली तथा पहाडी क्षेत्रमा सामान्यदेखि आंशिक बदली रहेको छ । कोशी प्रदेशका केही स्थानमा चट्याङसहित हल्का वर्षा भइरहेको छ ।
आज दिउँसो हिमाली र पहाडी भूभागका केही ठाउँमा चट्याङसहित हल्कादेखि मध्यम वर्षा हुन सक्ने अनुमान गरिएको छ । लुम्बिनी र सुदूरपश्चिमका तराई क्षेत्रका एक–दुई ठाउँमा पनि पानी पर्न सक्ने मौसमविद्ले बताएका छन् ।
मधेश प्रदेश र कोशी प्रदेशको तराई क्षेत्रमा भने गर्मी बढ्ने सम्भावना रहेको छ । तातो हावा र चर्को घामका कारण जनजीवन प्रभावित हुन सक्ने भएकाले सतर्क रहन आग्रह गरिएको छ ।
आज राति देशका अधिकांश तराई क्षेत्रमा मौसम सफा रहनेछ । पहाडी र हिमाली क्षेत्रका केही ठाउँमा भने हल्का वर्षा हुन सक्ने महाशाखाले जनाएको छ ।
