नेपालले आइतबार भएको पहिलो सेमिफाइनलमा ओमान राष्ट्रिय क्रिकेट टोली लाई ८ विकेटले पराजित गर्दै फाइनलमा स्थान बनाएको थियो। ओमानले दिएको ९५ रनको सामान्य लक्ष्य नेपालले केवल ९.२ ओभरमा २ विकेट गुमाएर पूरा गरेको हो।

नेपालको जितमा लोकेश बमले उत्कृष्ट ब्याटिङ गर्दै अविजित ४४ रन बनाए। उनले २६ बलमा ७ चौका र १ छक्का प्रहार गरेका थिए। यस्तै कुशल भुर्तेलले २० रन तथा कप्तान रोहित पौडेल ले अविजित २१ रन जोडे।

यसअघि टस जितेर ब्याटिङ गरेको ओमान १९.४ ओभरमा ९४ रनमै समेटिएको थियो। नेपालका लागि करण केसीले ३ विकेट लिए भने सोमपाल कामी र सन्दीप लामिछानेले २–२ विकेट लिए।

उता दोस्रो सेमिफाइनलमा मलेसिया राष्ट्रिय क्रिकेट टोलीलाई ६ विकेटले हराउँदै हङकङ फाइनलमा पुगेको हो। मलेसियाले दिएको ११५ रनको लक्ष्य हङकङले १८.२ ओभरमा ४ विकेट गुमाएर पूरा गरेको थियो।

जारी प्रतियोगितामा नेपाल र हङकङ दुवै टोली अपराजित छन्। त्यसैले दुवै टोली फाइनल जित्दै अपराजित च्याम्पियन बन्ने लक्ष्यमा छन्। नेपाल र हङकङबीच टी–२० अन्तर्राष्ट्रिय मान्यता प्राप्त खेलमा हालसम्म १४ पटक प्रतिस्पर्धा भएको छ।

त्यसमा नेपालले ७ खेल जितेको छ भने हङकङले ५ खेल आफ्नो पक्षमा पारेको छ। दुई खेल वर्षाका कारण रद्द भएका थिए। फाइनल खेल सिङ्गापुरमा नेपाली समयअनुसार मध्याह्न १२:१५ बजे सुरु हुनेछ।

प्रतियोगिताको तेस्रो स्थानका लागि आजै मलेसिया र ओमानबीच प्रतिस्पर्धा हुँदैछ।