इरानमाथिको सैन्य आक्रमण स्थगित, युद्ध अन्त्यका लागि सम्झौता नजिक पुगेको ट्रम्पको दाबी

Prime TV News एक महिना अगाडि

काठमाडौ । अमेरिकी राष्ट्रपति डोनाल्ड ट्रम्पले इरानमाथि गर्ने भनिएको सैन्य आक्रमण स्थगित गरिएको घोषणा गर्दै युद्ध अन्त्यतर्फ महत्त्वपूर्ण कूटनीतिक प्रगति भएको दाबी गरेका छन् ।

बिहीबार ह्वाइट हाउसस्थित ओभल अफिसमा सञ्चारकर्मीसँग कुरा गर्दै ट्रम्पले अमेरिका र इरानबीच युद्ध अन्त्यका लागि ठुलो सहमति नजिक पुगेको बताएका हुन् । यसअघि उनले सामाजिक सञ्जालमार्फत पनि योजनाबद्ध आक्रमणहरू रोकिएको जानकारी दिएका थिए ।

तर इरानले भने ट्रम्पको दाबीलाई पुष्टि गरेको छैन । इरानको परराष्ट्र मन्त्रालयका प्रवक्ता इस्माइल बाघेईले सरकारी सञ्चारमाध्यममार्फत सार्वजनिक भएका सम्झौतासम्बन्धी समाचारलाई 'अनुमान मात्र' भन्दै अहिलेसम्म कुनै अन्तिम निर्णय नभएको स्पष्ट पारेका छन् ।

यसअघि पनि ट्रम्पले पटक–पटक अमेरिका र इरानबीच युद्ध अन्त्यको सहमति नजिक पुगेको बताएका थिए । तर यसपटकको घोषणाअघि केही घण्टामात्र उनले इरानमाथि कडा कारबाही गर्ने चेतावनी दिएका थिए ।

अमेरिका–इरान तनाव गत फेब्रुअरीको अन्त्यदेखि तीव्र बनेको थियो । त्यसयता दुवै पक्षबीच सैन्य तथा कूटनीतिक गतिविधि जारी रहेका छन् । अप्रिलमा युद्धविरामको प्रारम्भिक सहमति भए पनि बीच–बीचमा तनाव र जवाफी कारबाहीका घटनाहरू भइरहेका छन् ।