अमेरिकाले भव्य रूपमा मनाउँदै २५०औँ स्वतन्त्रता दिवस
Prime TV News २ हप्ता अगाडि 
काठमाडौ । संयुक्त राज्य अमेरिकाले आज आफ्नो २५०औँ स्वतन्त्रता दिवस विभिन्न कार्यक्रमका साथ मनाइरहेको छ।
यस अवसरमा फिलाडेल्फिया, न्युयोर्क र वासिङ्टन डीसीसहित सबै ५० राज्यमा परेड, ऐतिहासिक प्रदर्शनी, सांगीतिक कार्यक्रम र विभिन्न सांस्कृतिक गतिविधि आयोजना गरिएको छ।
डोनाल्ड ट्रम्पले यस अवसरमा राष्ट्रलाई सम्बोधन गर्ने कार्यक्रम रहेको ह्वाइट हाउसले जनाएको छ। सम्बोधनपछि वासिङ्टन डीसीमा इतिहासकै सबैभन्दा ठूलो आतिशबाजी प्रदर्शन गरिने कार्यक्रम छ।
तीव्र गर्मी र केही स्थानमा प्रतिकूल मौसमका बाबजुद ठूलो संख्यामा सर्वसाधारण उत्सवमा सहभागी भइरहेका छन्। फिलाडेल्फियामा दिउँसो १२ बजे ऐतिहासिक घण्टी बजाइएको थियो।
स्वतन्त्रता मल क्षेत्रमा अमेरिकी स्वतन्त्रता युद्धसँग सम्बन्धित ऐतिहासिक दृश्यहरूको पुनःप्रस्तुति पनि गरिएको छ। सन् १७७६ को जुलाई ४ मा उत्तर अमेरिकाका १३ वटा ब्रिटिस उपनिवेशले स्वतन्त्रताको घोषणा गर्दै बेलायतबाट अलग हुने निर्णय गरेका थिए। यही ऐतिहासिक घटनाको स्मरणमा प्रत्येक वर्ष जुलाई ४ मा स्वतन्त्रता दिवस मनाइन्छ।
यस वर्ष २५०औँ स्वतन्त्रता दिवसलाई विशेष बनाउँदै अमेरिकाले ‘अमेरिका २५०’ शीर्षकमा वर्षभर विभिन्न राष्ट्रिय कार्यक्रम सञ्चालन गरिरहेको छ।
