इङ्ग्ल्यान्डलाई हराउँदै अर्जेन्टिना लगातार दोस्रो पटक विश्वकप फाइनलमा
Prime TV News एक महिना अगाडि 
काठमाडौ । साविक विजेता अर्जेन्टिनाले इङ्ग्ल्यान्डलाई २–१ ले पराजित गर्दै लगातार दोस्रो पटक फिफा विश्वकपको फाइनलमा स्थान सुरक्षित गरेको छ।
अब अर्जेन्टिनाले आइतबार हुने उपाधि भिडन्तमा स्पेनसँग प्रतिस्पर्धा गर्नेछ भने पराजित इङ्ग्ल्यान्डले तेस्रो स्थानका लागि फ्रान्ससँग खेल्नेछ।
पहिलो हाफ गोलरहित बराबरीमा सकिएको खेलमा इङ्ग्ल्यान्डले ५६औँ मिनेटमा एन्थोनी गोर्डनको गोलमार्फत अग्रता बनाएको थियो। मोर्गन रोजर्सको उत्कृष्ट क्रसलाई सदुपयोग गर्दै गोर्डनले टोलीलाई अघि बढाएका थिए।
तर अर्जेन्टिनाले खेलको अन्त्यतिर उत्कृष्ट पुनरागमन गर्दै नतिजा आफ्नो पक्षमा पार्यो। लाउटारो मार्टिनेज र एन्जो फर्नान्डेजले गोल गर्दै अर्जेन्टिनालाई फाइनल यात्रा सुनिश्चित गराए।
बराबरीपछि इङ्ग्ल्यान्डले खेलमा फर्कने प्रयास गरे पनि स्पष्ट अवसर सिर्जना गर्न सकेन। अन्तिम समयमा गोलरक्षक एमिलियानो मार्टिनेजले जोर्डन पिकफोर्डको लामो पास सुरक्षित रूपमा नियन्त्रण गर्दै अर्जेन्टिनाको जित पक्का गरे।
यस खेलले नयाँ कीर्तिमान पनि बनाएको छ। सन् १९६६ यताका अभिलेखअनुसार अर्जेन्टिना र इङ्ग्ल्यान्डबीचको विश्वकप इतिहासमा पहिलो ३० मिनेटसम्म कुनै पनि टोलीले शट प्रहार नगरेको यो पहिलो खेल बनेको छ।
पहिलो हाफ सावधानीपूर्ण र प्रतिस्पर्धात्मक रहे पनि दोस्रो हाफमा तीन गोल हुँदा खेल रोमाञ्चक बनेको थियो। अब अर्जेन्टिनाले लगातार दोस्रो विश्वकप उपाधिको लक्ष्यसहित स्पेनविरुद्ध फाइनल खेल्नेछ ।
