अर्जेन्टिनालाई हराउँदै स्पेन १६ वर्षपछि विश्वकप च्याम्पियन
Prime TV News एक दिन अगाडि 
काठमाडौ । युरोपेली च्याम्पियन स्पेनले साविक विजेता अर्जेन्टिनालाई १–० ले पराजित गर्दै फिफा विश्वकप २०२६ को उपाधि जितेको छ।
यससँगै स्पेनले सन् २०१० पछि पहिलोपटक विश्वकपको ट्रफी उचाल्दै दोस्रो विश्व उपाधि आफ्नो नाममा लेखाएको छ । अमेरिकाको न्युजर्सीस्थित स्टेडियममा सम्पन्न फाइनल खेल निर्धारित ९० मिनेटसम्म गोलरहित बराबरीमा सकिएपछि खेल अतिरिक्त समयमा पुगेको थियो।
निर्णायक गोल अतिरिक्त समयको १०६औँ मिनेटमा फेर्रान टोरेजले गरे। उनले गरेको एकमात्र गोल नै स्पेनलाई विश्व च्याम्पियन बनाउन पर्याप्त बन्यो।
अर्जेन्टिनाले खेलको अन्त्यतिर ठूलो धक्का बेहोर्नुपर्यो। मिडफिल्डर एन्जो फर्नान्डेजले दोस्रो पहेँलो कार्ड पाएपछि रातो कार्डसहित मैदान छाड्नुपरेको थियो। त्यसपछि १० खेलाडीमा सीमित बनेको अर्जेन्टिनामाथि स्पेनले दबाब बढाउँदै निर्णायक गोल निकाल्यो।
स्पेनले बाँकी समयमा आफ्नो अग्रता जोगाउँदै १–० को जित सुनिश्चित गर्यो र १६ वर्षपछि फेरि विश्व फुटबलको सर्वोच्च उपाधि जित्न सफल भयो।
यसअघि सेमिफाइनलमा स्पेनले फ्रान्सलाई २–० ले पराजित गर्दै फाइनल यात्रा तय गरेको थियो। साविक विजेता अर्जेन्टिनाले भने इंग्ल्यान्डलाई २–१ ले हराएर उपाधि भिडन्तमा स्थान बनाएको थियो।
स्पेनका लागि यो इतिहासकै दोस्रो विश्वकप उपाधि हो भने अर्जेन्टिना लगातार दोस्रो पटक च्याम्पियन बन्ने लक्ष्य पूरा गर्न असफल रह्यो।
