इरानबाट अमेरिकी सैन्य अड्डामा क्षेप्यास्त्र आक्रमणको दाबी, अमेरिकाको जवाफी कारबाही

Prime TV News ३ दिन अगाडि

काठमाडौ । अमेरिकी सेनाले इरानले मध्यपूर्वस्थित आफ्ना सैन्य आधार शिविरहरूलाई लक्षित गर्दै अचानक ब्यालिस्टिक क्षेप्यास्त्र आक्रमण गरेको दाबी गरेको छ

अमेरिकी केन्द्रीय कमान्ड (सेन्टकम)का अनुसार मंगलबार साँझ गरिएको आक्रमणमा प्रहार गरिएका सबै क्षेप्यास्त्र सफलतापूर्वक अवरोध गरिएको छ। अमेरिकी सेनाले आक्रमणको लक्ष्य बनाइएका आधार शिविर वा स्थानबारे भने विस्तृत जानकारी सार्वजनिक गरेको छैन।

यस घटनापछि अमेरिकी र साउदी अरेबियाली सेनाले पूर्वी इराकमा इरान समर्थित भनिएका सशस्त्र समूहका अड्डालाई लक्षित गर्दै संयुक्त सैन्य कारबाही सञ्चालन गरेको जनाएको छ।

सेन्टकमका अनुसार पछिल्लो ७२ घण्टामा अमेरिकी सैन्य आधारहरूमा भएका ३० वटा ड्रोन आक्रमणको जवाफस्वरूप उक्त कारबाही गरिएको हो। ती ड्रोन आक्रमणमा इरानको समर्थन रहेको अमेरिकी पक्षको आरोप छ।

यद्यपि इरानले अमेरिकी आरोपबारे अहिलेसम्म कुनै आधिकारिक प्रतिक्रिया दिएको छैन। यो घटनाक्रम अमेरिका र इरानबीच केही समयदेखि प्रत्यक्ष सैन्य आक्रमण नहुँदै वार्ता पुनः सुरु हुने आशा व्यक्त भइरहेका बेला भएको हो। अमेरिकी राष्ट्रपति डोनाल्ड ट्रम्पले सोमबार इरानसँग 'धेरै मैत्रीपूर्ण वार्ता' भइरहेको बताएका थिए।

पछिल्ला घटनाक्रमले दुवै देशबीचको तनाव पुनः चर्किने संकेत दिएको छ भने मध्यपूर्वको सुरक्षा अवस्थाप्रति अन्तर्राष्ट्रिय समुदायको चासो बढेको छ। अमेरिकी पक्षले गरेका दाबीहरू स्वतन्त्र रूपमा पुष्टि भएका छैनन्।