मधेस विकासका लागि हिंसा त्यागेर एकजुट हुन रास्वपा नेता सिंहको आह्वान

Prime TV News २ दिन अगाडि

काठमाडौ । राष्ट्रिय स्वतन्त्र पार्टी नेता तथा प्रतिनिधिसभा सदस्य डा. अमरेश कुमार सिंहले मधेसको समुन्नत विकासका लागि सबै वर्ग र समुदाय एकजुट भएर अघि बढ्नुपर्ने बताएका छन्।

सामाजिक सञ्जालमार्फत अपिल जारी गर्दै सिंहले विगतका आन्दोलन, जातीय तथा धार्मिक द्वन्द्व र हिंसात्मक गतिविधिले मधेसको विकासमा ठूलो असर परेको बताएका हुन्।

उनले यस्ता गतिविधिका कारण भौतिक संरचना क्षति हुनुका साथै शैक्षिक गतिविधि प्रभावित र व्यापार–व्यवसायमा अवरोध सिर्जना भएको उल्लेख गरेका छन्। 'अब समय आएको छ, सबै वर्ग र समुदाय मिलेर मधेसको विकासको एजेन्डालाई अगाडि बढाउने,' सिंहले भनेका छन्।

सांसद सिंहले अबको मधेसको प्राथमिकता शिक्षा, स्वास्थ्य, भौतिक पूर्वाधार, कृषि क्षेत्रको सुधार र युवाका लागि रोजगारी सिर्जना हुनुपर्नेमा जोड दिएका छन्। उनले दीर्घकालीन विकासका लागि सामाजिक एकता र शान्तिपूर्ण वातावरण आवश्यक रहेको बताए।

उनले समाजमा अशान्ति फैलाउने तथा सद्भाव खलल पार्ने कुनै पनि असामाजिक तत्वको पछि नलाग्न मधेसवासीलाई आग्रह गरेका छन्। शान्ति र विकासको विरोध गर्ने व्यक्ति जुनसुकै समुदाय वा वर्गका भए पनि उनीहरू मधेसको हितविपरीत हुने भन्दै सिंहले त्यस्ता गतिविधिलाई निरुत्साहित गर्नुपर्ने धारणा व्यक्त गरेका छन्।