रास्वपाले सुरु गर्दै ‘हामी सुन्छौँ’ अभियान, नागरिकका गुनासा प्रत्यक्ष सुन्ने
Prime TV News एक घण्टा अगाडि 
काठमाडौ । राष्ट्रिय स्वतन्त्र पार्टीले नागरिकका गुनासा, समस्या र सुझाव प्रत्यक्ष रूपमा सुन्ने उद्देश्यसहित ‘हामी सुन्छौँ’ अभियान सञ्चालन गर्ने भएको छ।
पार्टीका अनुसार आगामी साउन २५ गतेदेखि केन्द्रीय कार्यालय घण्टीघरबाट अभियान सुरु हुनेछ। नागरिकका समस्या पहिचान गरी आवश्यक सहजीकरण र समाधानका लागि प्रत्यक्ष संवाद गर्ने उद्देश्यले अभियान सञ्चालन गर्न लागिएको हो। यस अभियान सञ्चालन गर्ने निर्णय साउन १३ गते बसेको केन्द्रीय समिति बैठकले गरेको थियो।
अभियानअन्तर्गत प्रत्येक दिन केन्द्रीय सदस्य र प्रतिनिधिसभा सदस्यहरूमध्येबाट दुई जनाको नियमित उपस्थिति रहने व्यवस्था गरिएको छ। नागरिकका गुनासा तथा सुझाव सुन्न कम्तीमा एक जना प्रतिनिधिसभा सदस्यको उपस्थिति अनिवार्य गरिएको रास्वपाले जनाएको छ ।
रास्वपाले ‘हामी सुन्छौँ’ अभियानमार्फत नागरिकसँग प्रत्यक्ष सम्बन्ध विस्तार गर्ने र उनीहरूले उठाएका विषयलाई सम्बन्धित निकायसम्म पुर्याउन सहजीकरण गर्ने जनाएको छ।
