शेख हसिनाको सार्वजनिक गतिविधिलाई लिएर भारत–बंगलादेश सम्बन्धमा नयाँ तनाब
Prime TV News एक महिना अगाडि 
काठमाडौ । भारत र बंगलादेशबीच पूर्वप्रधानमन्त्री शेख हसिनाको सार्वजनिक गतिविधिलाई लिएर कूटनीतिक तनाव बढेको छ।
भारतमा बसेर उनले पत्रकारहरूसँग गरेको भर्चुअल संवादपछि बंगलादेश सरकारले कडा आपत्ति जनाएको हो। बंगलादेशको विदेश मन्त्रालयले जारी गरेको विज्ञप्तिमा उक्त कार्यक्रमले देशको सार्वभौमिकता र राष्ट्रिय सम्मानमा असर पुगेको दाबी गरिएको छ।
मन्त्रालयले भारतसँग पारस्परिक सम्मान र एकअर्काको आन्तरिक मामिलामा हस्तक्षेप नगर्ने सिद्धान्तअनुसार सम्बन्ध अघि बढाउन चाहेको पनि जनाएको छ। भर्चुअल पत्रकार सम्मेलनमा शेख हसिनाले आफू उपयुक्त समयमा स्वदेश फर्किने योजना रहेको उल्लेख गरेकी थिइन्। यद्यपि उनले फर्किने निश्चित मिति भने सार्वजनिक गरिनन्।
यस विषयमा भारतको विदेश मन्त्रालयले भने कार्यक्रम सरकारको आयोजनामा नभई निजी संस्थाले आयोजना गरेको स्पष्ट पारेको छ। मन्त्रालयका अनुसार कार्यक्रममा व्यक्त गरिएका धारणा भारत सरकारको आधिकारिक दृष्टिकोण होइनन्।
यसैबीच, अवामी लिगले पूर्व क्रिकेट कप्तान शाकिब अल हसनको निवासमा पेट्रोल बम आक्रमण भएको दाबी गरेको छ। घटनाबारे सम्बन्धित निकायबाट स्वतन्त्र पुष्टि भने सार्वजनिक भएको छैन। शेख हसिना सन् २०२४ मा सत्ता परिवर्तनपछि भारतमा रहँदै आएकी छन्।
उनीविरुद्ध बंगलादेशमा विभिन्न कानुनी मुद्दा चलिरहेका छन् भने अवामी लिगको राजनीतिक गतिविधिमाथि पनि प्रतिबन्ध तथा अन्य कानुनी व्यवस्था लागू गरिएको छ। विश्लेषकहरूका अनुसार पछिल्ला घटनाक्रमले भारत–बंगलादेश सम्बन्धमा नयाँ कूटनीतिक चुनौती थपिएको संकेत गरेको छ।
आगामी दिनमा दुवै देशबीच हुने संवाद र कूटनीतिक पहलले परिस्थितिको दिशा निर्धारण गर्ने अपेक्षा गरिएको छ।
