सामूहिक भेटपछि पनि विभिन्न देशका राजदूतहरूले प्रधानमन्त्री शाहसँग छुट्टाछुट्टै भेटवार्ताका लागि प्रयास गरेका थिए। तर शाहले त्यस्ता भेटका लागि समय नदिएको कूटनीतिक स्रोतको भनाइ छ।

विदेशबाट नेपाल आएका उच्चस्तरीय कूटनीतिज्ञसँग समेत प्रधानमन्त्रीले भेट नगरेपछि नेपालको कूटनीतिक सम्बन्धबारे प्रश्न उठ्दै आएको थियो। भारतका विदेश सचिव विक्रम मिस्रीको नेपाल भ्रमणसमेत प्रधानमन्त्रीसँग भेटवार्ता हुन नसक्ने भएपछि स्थगित भएको दाबी गरिएको छ।

प्रधानमन्त्री शाहलाई विदेशी कूटनीतिज्ञसँग नियमित संवाद अघि बढाउन विभिन्न तहबाट सुझाव दिइँदै आएको थियो। परराष्ट्रमन्त्री शिशिर खनालले समेत भेटवार्ता र विदेश भ्रमणका लागि प्रधानमन्त्रीलाई पटक–पटक आग्रह गरेको बताइएको छ।

यसबीच नेपालको कूटनीतिक सम्बन्धलाई सक्रिय बनाउन राष्ट्रिय स्वतन्त्र पार्टीका सभापति रवि लामिछाने र परराष्ट्रमन्त्री खनाल सक्रिय भएका छन्। लामिछानेले भारतको पाँचदिने भ्रमण गरिसकेका छन् भने खनालले भारत र चीनको भ्रमण गरिसकेका छन्। लामिछाने चीन भ्रमणको तयारीमा रहेको बताइएको छ।

विदेश भ्रमणको बाटो खुल्ने अपेक्षा

संयुक्त राष्ट्रसंघको महासभामा सहभागी हुन प्रधानमन्त्री शाह अमेरिका जाने अपेक्षा गरिए पनि उनी नजाने भएपछि परराष्ट्रमन्त्री खनालले नेपालको प्रतिनिधित्व गर्ने तयारी गरिरहेका छन्। प्रधानमन्त्री शाहलाई भारत र चीनबाट भ्रमणको निम्तोसमेत प्राप्त भएको बताइएको छ।

यद्यपि, हालसम्म उनले विदेश भ्रमण गर्ने निर्णय गरेका छैनन्। अब विदेशी राजदूतसँगको छुट्टाछुट्टै भेटवार्ता सुरु हुनुलाई सरकारले नेपालको कूटनीतिक सम्बन्धलाई थप सक्रिय बनाउने प्रयासका रूपमा लिएको छ।

यी भेटवार्तापछि प्रधानमन्त्री शाहको सम्भावित विदेश भ्रमणका लागि समेत वातावरण बन्ने अपेक्षा गरिएको छ।