बुबाको निधनपछि भावुक बने मेसी, फुटबल करियरबारे गरे यस्तो संकेत

Prime TV News एक महिना अगाडि

काठमाडौ । अर्जेन्टिनाका सुपरस्टार लियोनेल मेसी आफ्ना बुबा जर्ज मेसीको निधनपछि भावुक बनेका छन्।

सामाजिक सञ्जालमार्फत श्रद्धाञ्जली व्यक्त गर्दै मेसीले बुबाबिनाको जीवन कसरी अघि बढाउने भन्नेमा आफू अन्योलमा रहेको र आफ्नो फुटबल करियरलाई निरन्तरता दिने विषयमा समेत शंका उत्पन्न भएको बताएका छन्।

६८ वर्षीय जर्जको अगस्ट ७ मा अर्जेन्टिनाको रोसारियोमा लामो समयदेखि रहेको स्वास्थ्य समस्याका कारण निधन भएको थियो। उनी मेसीका बुबा मात्र नभई लामो समयसम्म उनका प्रतिनिधि तथा करियरका महत्वपूर्ण सल्लाहकारसमेत थिए।

मेसीले आफ्ना बुबालाई जीवन र फुटबल यात्राको सुरुदेखिकै सबैभन्दा महत्वपूर्ण व्यक्तिका रूपमा सम्झिएका छन्। उनले बुबासँगको यात्रा अझै केही समय सँगै अघि बढाउन चाहेको तर त्यो सम्भव हुन नसकेको भाव व्यक्त गरेका छन्।

मेसीका अनुसार जर्जले उनलाई अन्तिम पटक विश्वकप खेल्दै गरेको हेर्न चाहेका थिए। बुबाको स्वास्थ्य अवस्था गम्भीर बन्दै गए पनि मेसीले उनको इच्छाकै लागि २०२६ को विश्वकपमा सहभागी भएको बताएका छन्। विश्वकपमा अर्जेन्टिना फाइनलसम्म पुगे पनि स्पेनसँग १–० ले पराजित भएको थियो।

विश्वकपका खेलपछि आफूले बुबाको सन्देशको प्रतीक्षा गर्ने गरेको तर सन्देश नआएपछि मात्र उनको स्वास्थ्य अवस्था कति गम्भीर भइसकेको रहेछ भन्ने महसुस गरेको मेसीले बताएका छन्। बुबाको निधनपछि मेसीको समर्थनमा फुटबल जगतबाट पनि सन्देश आएका छन्।

उनका लामो समयका प्रतिद्वन्द्वी क्रिस्टियानो रोनाल्डोले मेसी र उनको परिवारप्रति समवेदना तथा कठिन समयमा शक्ति मिलोस् भन्ने सन्देश दिएका छन्। इन्टर मियामीसँग आबद्ध मेसीका लागि जर्जको निधन व्यक्तिगत रूपमा ठूलो क्षति भएको छ।

मेसीले आफ्ना बुबालाई पिता मात्र नभई साथी र मार्गदर्शकका रूपमा स्मरण गर्दै आफूले सिकेका मूल्य र संस्कार आफ्ना सन्तानलाई पनि हस्तान्तरण गर्ने बताएका छन्। जर्जको निधनपछि मेसीले फुटबलबाट तत्कालै सन्यास लिने घोषणा भने गरेका छैनन्।

तर श्रद्धाञ्जली सन्देशमा उनले आफ्नो भविष्यबारे व्यक्त गरेको भावनाले उनको खेलजीवनलाई लिएर समर्थकमाझ चासो बढाएको छ।