होर्मुजलाई ‘नयाँ अमेरिकी भूभाग’ भनेपछि इरानको व्यङ्ग्यात्मक जवाफ: ‘क्यालिफोर्निया हाम्रो नयाँ भूभाग’

Prime TV News ३ हप्ता अगाडि

काठमाडौ । अमेरिकी राष्ट्रपति डोनाल्ड ट्रम्पले होर्मुज जलडमरूमध्यलाई ‘नयाँ अमेरिकी भूभाग’ भनेर दाबी गरेपछि इरानी कूटनीतिज्ञहरूले व्यङ्ग्यात्मक प्रतिक्रिया दिएका छन्।

भारतस्थित इरानी कूटनीतिज्ञहरूले अमेरिकाको नक्सा सार्वजनिक गर्दै क्यालिफोर्नियालाई हाइलाइट गरेर त्यसमा ‘इस्लामिक गणतन्त्र इरानको नयाँ भूभाग’ लेखेका छन्। भारतको हैदराबादस्थित इरानी वाणिज्य दूतावासले सामाजिक सञ्जालमार्फत उक्त नक्सा सार्वजनिक गरेको हो।

इरानी दूतावासको यो पोस्ट स्पष्ट रूपमा व्यङ्ग्यात्मक देखिन्छ। यसको सन्दर्भ अमेरिकामा रहेको ठूलो इरानी आप्रवासी समुदायसँग जोडिएको छ। माइग्रेसन पोलिसी इन्स्टिच्युटका अनुसार अमेरिकामा रहेका इरानी आप्रवासीको ठूलो हिस्सा क्यालिफोर्नियामा बसोबास गर्छ। तीमध्ये धेरै लस एन्जलस क्षेत्रमा रहेका छन्।

लस एन्जलसमा ठूलो संख्यामा इरानी तथा फारसीभाषी समुदायको बसोबास रहेकाले कतिपयले व्यङ्ग्यात्मक रूपमा उक्त क्षेत्रलाई ‘टिहरान्जेल्स’ भन्ने गर्छन्। यो नाम टिहरान र लस एन्जलसलाई जोडेर बनाइएको हो।

इरानमाथि अमेरिका र इजरायलको सैन्य कारबाही सुरु भएपछि अमेरिकामा रहेका इरानी मूलका समुदायमा पनि धारणा विभाजित भएको छ। केहीले सैन्य कारबाहीबाट इरानको वर्तमान सरकार कमजोर वा पतन हुने आशा गरेका छन् भने केहीले बाह्य सैन्य हस्तक्षेपले उल्टै नकारात्मक परिणाम ल्याउन सक्ने चिन्ता व्यक्त गरेका छन्।

इरानी वाणिज्य दूतावासको पछिल्लो पोस्ट भने ट्रम्पको होर्मुजसम्बन्धी भनाइप्रतिको राजनीतिक व्यङ्ग्यका रूपमा आएको देखिन्छ। ट्रम्पले होर्मुज जलडमरूमध्यलाई ‘नयाँ अमेरिकी भूभाग’ भनेपछि इरानबाट आएको यो प्रतिक्रियाले दुई देशबीच बढ्दो तनावका बीच सामाजिक सञ्जालमा देखिएको कटाक्षपूर्ण कूटनीतिक अभिव्यक्तिलाई समेत उजागर गरेको छ।