पेरुको दक्षिणी एन्डिज क्षेत्रमा ६.७ म्याग्निच्युडको शक्तिशाली भूकम्प
Prime TV News ३ हप्ता अगाडि 
काठमाडौ । पेरुको दक्षिणी एन्डिज क्षेत्रमा बिहीबार ६.७ म्याग्निच्युडको शक्तिशाली भूकम्प गएको छ।
भूकम्पबाट कम्तीमा दुई जना घाइते भएका छन् भने घर, स्वास्थ्य केन्द्र र विद्यालयमा क्षति पुगेको अधिकारीहरूले बताएका छन्। अमेरिकी भूगर्भीय सर्वेक्षणका अनुसार स्थानीय समयअनुसार बिहीबार दिउँसो १ बजे भूकम्प गएको हो।
भूकम्पको केन्द्रबिन्दु अयाकुचो क्षेत्रको परिनाकोचास प्रान्तअन्तर्गत उपाहुआचो सहरबाट ३८ किलोमिटर उत्तर–पश्चिममा रहेको थियो। भूकम्प ६६ किलोमिटर गहिराइमा गएको जनाइएको छ।
भूकम्पको धक्का राजधानी लिमा, इका, अरेक्विपा, हुआन्काभेलिका, अपुरिम्याक र कुस्कोसहित दक्षिणी पेरुका विभिन्न क्षेत्रमा महसुस गरिएको थियो।
नागरिक रक्षा प्रमुख लुइस भास्केजका अनुसार परिनाकोचास प्रान्तको राजधानी कोराकोरा क्षेत्रमा भूकम्पका बेला घरबाट बाहिर निस्कने क्रममा दुई जना घाइते भएका छन्।
अधिकारीहरूका अनुसार पुक्वियो, पुलो, कोराकोरा, उपाहुआचो, सान पेड्रो र पिचारीलगायत अयाकुचो तथा कुस्कोका विभिन्न जिल्लामा २२ घर, ६ स्वास्थ्य केन्द्र र एउटा विद्यालयमा क्षति पुगेको छ।
भूकम्पपछि स्थानीय प्रशासनले क्षतिको थप विवरण संकलन तथा प्रभावित क्षेत्रमा आवश्यक उद्धार र राहतको काम अघि बढाएको जनाएको छ।
