शिक्षा विधेयकः ६० प्रतिशत शिक्षक आन्तरिक प्रतिस्पर्धाबाट नियुक्त गर्न सरकार तयार, महासंघले खोज्यो ७५ प्रतिशत

Prime TV News एक महिना अगाडि

काठमाडौं, १८ असार । शिक्षा, विज्ञान तथा प्रविधिमन्त्री रघुजी पन्तले सरकारको कारण विद्यालय शिक्षा विधेयक नरोकिएको बताएका छन् । राष्ट्रिय सभामा विनियोजन विधेयकमाथिको छलफलमा उठेका प्रश्नहरुको जवाफ दिने क्रममा उनले विगतको सरकारसँग महासंघले गरेको सहमतिको कारण विधेयक समयमा नै आउन नसकेको बताएका हुन् । मन्त्री पन्तकको अनुसार विगतको सरकारले शिक्षकहरुको नियुक्ति ७५ प्रतिशत आन्तरिक र २५ प्रतिशत मात्रै खुला प्रतियोगिताबाट हुने सहमति गरेको छ । तर, अहिलेको सरकारले ६० प्रतिशत आन्तरिक र ४० प्रतिशत खुला गर्न खोज्दा समयमै निकास ननिस्किएको उनको भनाइ छ ।

‘विगतको सरकारले उहाँहरुसँग के सम्झौता गरेको रहेछ भने ७५ प्रतिशत आन्तरिक र २५ प्रतिशत खुला । त्यसलाई हाम्रो समितिले स्वीकार गरेन । यसरी आन्तरिक गर्दा देशका नयाँ युवाहरुलाई अरब पठाउने हो ? उनीहरुले शिक्षामा रोजगारी पाउनुपर्दैन ? त्यसैले ४० खुला गर, ६० प्रतिशत चाहिँ आन्तरिक प्रतियोगिताबाट गरौं भन्ने भयो । सरकारको तर्फबाट मैले त्यसलाई मानेँ । तर, समस्या के भयो भनेदेखि त्यही कुरामा आएर कुरा अड्किराखेको छ । शिक्षकहरु ७५ र २५ भन्ने,’– उनले भने ।

विधेयक सरकारको तर्फबाट नअड्किएको उनले बताए । शिक्षकहरु पटक.–पटक सडकमा जाने परिस्थिति नआओसु भन्नेमा आफूहरु गम्भीर रहेको पनि उनले बताए । आफू मन्त्री भएपछि शिक्षक महासंघसँग कम्तिमा पनि १२÷१५ पटक बसेर आफूले निकास खोज्ने प्रयास गरेको उनले बताए । आफूले ६०/४० मान्नुस् भन्दा महासंघले ७५/२५ मै कुरा अड्काइराखेको उनको भनाइ छ ।