बेपत्ता आफन्तको सम्झनामा पशुपतिमा कुशको शव बनाएर अन्तिम संस्कार

Prime TV News १ हप्ता अगाडि

काठमाडौ । रसुवाको भोटेकोशीमा भदौ १० गते आएको विनाशकारी बाढीमा परी बेपत्ता भएकाहरूका आफन्तले शुक्रबार पशुपति आर्यघाटमा कुशको शव बनाएर सामूहिक रूपमा अन्तिम संस्कार गरेका छन्।

बाढीमा परी लामो समयदेखि सम्पर्कविहीन रहेका आफन्तको अवस्था अझै अज्ञात रहेको र शवसमेत फेला नपरेपछि परिवारजनले हिन्दु संस्कारअनुसार कुशको प्रतिमा बनाएर दाहसंस्कार गरेका हुन्। बेपत्ता भएकाहरूका आफन्तले पशुपति आर्यघाटमा कुशबाट शवको प्रतिमा तयार गरी अन्तिम संस्कार गरेका छन्।

पशुपति क्षेत्र विकास कोषले उनीहरूका लागि निःशुल्क दाहसंस्कारको व्यवस्था मिलाएको जनाएको छ। भोटेकोशी बाढी र त्यसपछि आएको विपद्मा परी हालसम्म १ हजार २९० जनाको शव फेला परिसकेको छ। तर, अझै ५ हजारभन्दा बढी नागरिक सम्पर्कविहीन रहेको बताइएको छ। फेला परेका शवमध्ये हालसम्म ९३ जनाको मात्र सनाखत भएको छ।

लामो समयसम्म आफन्तको कुनै खबर नआएपछि परिवारजनले शव प्राप्त हुने आशा कमजोर बन्दै गएपछि कुशको शव बनाएर अन्तिम संस्कार गर्न थालेका हुन्। यस्तो अवस्थामा गरिएको कुशको दाहसंस्कारले बेपत्ता परिवारले भोगिरहेको पीडा र अनिश्चितताको अवस्थालाई समेत उजागर गरेको छ।

यसैबीच, सरकारले रसुवा, नुवाकोट, धादिङ, गोरखा, चितवनलगायत बाढी प्रभावित जिल्लामा बेपत्ता नागरिकको खोजी तथा उद्धार कार्यलाई निरन्तरता दिएको छ। सुरक्षा निकाय तथा उद्धार टोलीले नदी, सुरुङ, पहिरो प्रभावित क्षेत्र तथा अन्य सम्भावित स्थानमा खोजी गरिरहेका छन्। ठूलो संख्यामा नागरिक अझै सम्पर्कविहीन रहेकाले खोज तथा उद्धार अभियानलाई थप तीव्र बनाइएको छ।