युक्रेन युद्ध अन्त्य गर्न वार्ताको सम्भावना देखे पुटिन, मस्को–किभ पुग्दै अमेरिकी वार्ताकार

Prime TV News १ हप्ता अगाडि

काठमाडौ । रूसी राष्ट्रपति भ्लादिमिर पुटिनले युक्रेनसँग जारी युद्ध अन्त्य गर्ने विषयमा सहमतिमा पुग्ने सम्भावना रहेको बताएका छन्।

बिहीबार एक आर्थिक मञ्चमा बोल्दै उनले युद्ध अन्त्यका लागि विभिन्न देशले देखाएको चासोप्रति सकारात्मक धारणा व्यक्त गरेका हुन्। पुटिनका अनुसार अमेरिका र चीनसहितका केही देश शान्ति सम्झौता गराउन सहयोग गर्न तयार देखिएका छन्। यद्यपि, अन्तिम समाधान भने रूस र युक्रेनबीचको सहमतिबाटै सम्भव हुने उनको भनाइ छ।

उनले शान्ति स्थापनाका लागि योगदान गर्न खोजिरहेका सबै पक्षप्रति आभार व्यक्त गर्दै वार्ताबाट समाधान खोज्ने सम्भावना रहेको बताए। यसैबीच, युक्रेनी राष्ट्रपति भोलोदिमिर जेलेन्स्कीले पनि युद्ध अन्त्य गर्ने प्रयासस्वरूप अमेरिकी वार्ताकारहरूले मस्को र किभको भ्रमण गर्न लागेको बताएका छन्। उनका अनुसार भ्रमणका लागि प्रारम्भिक मिति तय भइसकेको छ।

बिहीबार राति राष्ट्रका नाममा गरेको भिडियो सम्बोधनमा जेलेन्स्कीले अमेरिकी राष्ट्रपतिका प्रतिनिधिलाई किभमा स्वागत गर्ने अपेक्षा गरिएको बताए। उनका अनुसार अमेरिकी प्रतिनिधिहरूले किभ र मस्को दुवैमा सम्बन्धित पक्षसँग भेटवार्ता गर्नेछन्। जेलेन्स्कीले अमेरिकाले युद्ध अन्त्य गर्ने कूटनीतिक प्रयासमा सक्रिय भूमिका निरन्तर राख्नुपर्नेमा समेत जोड दिएका छन्।

यसअघि अमेरिकी गुप्तचर संस्था सीआईएका प्रमुख जोन र्याटक्लिफले रूस भ्रमण गरेका थिए। उक्त भ्रमणका क्रममा उनले अमेरिकी राष्ट्रपति डोनाल्ड ट्रम्प, रूसी राष्ट्रपति पुटिन र युक्रेनी राष्ट्रपति जेलेन्स्कीबीच त्रिपक्षीय शिखर बैठकको प्रस्ताव अघि सारेको अमेरिकी सञ्चारमाध्यम एक्सियसले जनाएको थियो।

र्याटक्लिफको रूस भ्रमणको उद्देश्य अमेरिकी मध्यस्थतामा रूस र युक्रेनबीच वार्ता पुनः सुरु गर्ने सम्भावनाबारे बुझ्नु पनि रहेको बताइएको छ। अमेरिकी अधिकारीहरूले उनको भ्रमण र प्रस्तावबारे जेलेन्स्कीलाई जानकारी गराइसकेका थिए।

युद्ध अन्त्यका लागि यसअघि पनि ट्रम्प प्रशासनले पुटिन, जेलेन्स्की र ट्रम्पबीच प्रत्यक्ष बैठकको प्रस्ताव अघि सारेको थियो। जेलेन्स्कीले प्रस्तावप्रति सहमति जनाए पनि पुटिनले यस्तो त्रिपक्षीय बैठकप्रति सकारात्मक प्रतिक्रिया नदिँदै आएका थिए।

तर पछिल्ला दिनमा पुटिन र जेलेन्स्की दुवैले युद्ध अन्त्यका लागि वार्ता र कूटनीतिक समाधानको सम्भावनाबारे सकारात्मक धारणा सार्वजनिक गरेका छन्। यसले लामो समयदेखि जारी रूस–युक्रेन युद्ध अन्त्य गर्न नयाँ चरणको कूटनीतिक पहल अघि बढ्न सक्ने संकेत गरेको छ।