फेरान टोरेसको ह्याट्रिकमा पीएसजीको सानदार जित

Prime TV News ५ दिन अगाडि

काठमाडौ । साविक विजेता पेरिस सेन्ट जर्मेन (पीएसजी) ले च्याम्पियन्स लिगको नयाँ सिजनमा सानदार सुरुवात गरेको छ।

गएराति भएको खेलमा पीएसजीले स्लोभान ब्राटिस्लाभालाई ६–१ गोल अन्तरले पराजित गरेको हो। पीएसजीको जितमा स्पेनिस फरवार्ड फेरान टोरेसले ह्याट्रिक गरे भने उसमान डेम्बेलेले दुई तथा फेबियन रुइजले एक गोल गरे।

स्लोभानका लागि सुलेमान कामाराले एक गोल फर्काए। खेलको १७औँ मिनेटमा डेम्बेलेले गोल गर्दै पीएसजीलाई सुरुवाती अग्रता दिलाए। उनले २३औँ मिनेटमा व्यक्तिगत दोस्रो गोल गर्दै टोलीको अग्रता २–० बनाए।

३१औँ मिनेटमा डेम्बेलेको पासमा टोरेसले गोल गर्दै पीएसजीलाई ३–० को अग्रता दिलाए। दोस्रो हाफको दोस्रो मिनेटमै टोरेसले व्यक्तिगत दोस्रो गोल गरे भने ५७औँ मिनेटमा तेस्रो गोल गर्दै ह्याट्रिक पूरा गरे।

टोरेसले ह्याट्रिक पूरा गरेको एक मिनेटपछि कामाराले स्लोभानका लागि एक गोल फर्काए। खेलको ८७औँ मिनेटमा रुइजले गोल गरेपछि पीएसजी ६–१ को फराकिलो जित निकाल्न सफल भयो।

यसै सिजन बार्सिलोनाबाट पीएसजी पुगेका टोरेसले फ्रान्सेली क्लबका लागि युरोपेली प्रतियोगिताको पहिलो खेलमै ह्याट्रिक गर्दै प्रभावशाली सुरुवात गरेका छन्।

गएराति भएका अन्य खेलमा बार्सिलोनाले फेयेनोर्डलाई ५–१, स्टुटगार्टले भाइकिङलाई ३–१, लिभरपुलले एट्लेटिको मड्रिडलाई २–१, आर्सनलले नापोलीलाई १–० तथा स्पोर्टिङ सिपीले गालातासारेलाई ३–१ ले पराजित गरे।