प्रतिनिधिसभा बैठक आज, विभिन्न मन्त्रालयका प्रश्नको जवाफ दिँदै मन्त्रीहरू
Prime TV News ४ घण्टा अगाडि 
काठमाडौ । सङ्घीय संसद् प्रतिनिधि सभाको बैठक आज मंगलबार अपराह्न १ बजे बस्दैछ।
संसद् सचिवालयले बैठकका लागि विभिन्न मन्त्रालयसँग सम्बन्धित प्रश्नोत्तर तथा प्रस्ताव प्रस्तुत गर्ने कार्यसूची तय गरेको छ । बैठकमा परराष्ट्र मन्त्रालयसँगै भूमि व्यवस्था, सहकारी तथा गरिबी निवारण र सङ्घीय मामिला तथा सामान्य प्रशासन मन्त्रालयसँग सम्बन्धित मौखिक प्रश्नको सम्बन्धित मन्त्रीहरूले जवाफ दिनेछन्।
त्यस्तै, कानुन, न्याय तथा संसदीय मामिलामन्त्री सोविता गौतमले एसियाली विधायिकी संस्थाहरूको परिषद्को सदस्यता प्राप्त गर्ने सम्बन्धमा नेपाल सरकारले गरेको घोषणासहितको सम्मिलन अनुमोदन गरियोस् भन्ने प्रस्ताव प्रस्तुत गर्ने कार्यसूची छ।
प्रतिनिधिसभा बैठकसँगै आज विभिन्न संसदीय विषयगत समितिका बैठक पनि बस्दैछन्। अन्तर्राष्ट्रिय सम्बन्ध तथा पर्यटन समिति, शिक्षा, स्वास्थ्य तथा सूचना प्रविधि समिति, विधायन व्यवस्थापन समिति र सङ्घीयता सबलीकरण तथा राष्ट्रिय सरोकार समितिको बैठक बस्ने तय भएको छ।
